Ироқдаги COVID-касалхона ёниб кетди, 77 киши ҳалок бўлди (видео)

Ироқ жанубидаги Ди-Қар вилоятининг Насирия шаҳридаги COVID-19 беморларига мўлжалланган касалхонада ёнғин содир бўлди. Ҳодиса қурбонларининг сони 77 кишига етди, 20 киши эвакуация натижасида қутқариб қолинди, деб ёзмоқда Al Arabiya телеканали вилоят Соғлиқни сақлаш бошқармасига асосланиб.

Қайд этилишича, қурбонларнинг аксарияти куйиш ёки бўғилишдан вафот этган. Шунингдек, ҳодиса натижасида 70 га яқин одам жароҳат олган.

Дастлаб Соғлиқни сақлаш бошқармаси ёнғинда 46 киши ҳалок бўлгани ҳақида хабар қилган.

«Насирия шаҳридаги Имом Ҳусайн касалхонасининг коронавирусга чалинган одамлар учун ажратилган изоляторида содир бўлган ёнғин туфайли 46 киши ҳалок бўлди, 70 киши жароҳат олди», — дейилганди бошқарма хабарида. Кейинчалик бошқарма қурбонлар сони 52 кишига етганини маълум қилди.

Дастлабки маълумотларга кўра, COVID-касалхонада ёнғин чиқишига кислород баллонининг портлаши сабаб бўлган. Шунингдек, версиялардан бирида ёнғин сабаби қисқа туташув экани айтилган. Ироқ Соғлиқни сақлаш вазирлиги ёнғин сабабларини расман эълон қилмади.

Хабарга кўра, ўнлаб одамлар касалхонада қамалда қолган, аммо ўт ўчирувчилар ёнғин тарқалишини чеклашга муваффақ бўлди. Ҳодиса муносабати билан вилоят Соғлиқни сақлаш вазирлиги фавқулодда ҳолат эълон қилди.

Телеканал манбаларининг хабар беришича, ёнғин содир бўлган филиал атиги уч ой олдин очилган. У 70 нафар беморга мўлжалланган эди.

Ди-Қара Соғлиқни сақлаш бошқармаси вакили Аммар ал-Замилининг маҳаллий ОАВга айтишича, ёнғин бошланганда бўлимда камида 63 бемор бўлган. Таъкидланишича, бино ёнувчан материаллардан қурилган.

Эслатиб ўтамиз, 24 апрель куни Ироқнинг Бағдод шаҳрида жойлашган Ибн ал-Хатиб касалхонасида ёнғин содир бўлганди. Касалхонада ёнғиндан ҳимоя тизими бўлмаган. Дастлабки маълумотларга кўра, ёнғин бошланишига кислород баллонининг портлаши сабаб бўлган. Сўнгги маълумотлар бўйича 88 киши ҳалок бўлган, 100 дан ортиғи жароҳат олган. Қурбонларнинг камида 28 нафари сунъий нафас олдириш аппаратларига уланган беморлар бўлган.

Ўша ёнғиндан кейин Ироқда уч кунлик мотам эълон қилинганди. Ироқ соғлиқни сақлаш вазири ва Бағдод губернатори ишдан бўшатилган.