Евроиттифоқ Афғонистонга у ердан АҚШ ва НАТО ҳарбийлари олиб кетилганидан кейин мамлакатда вазиятни барқарорлаштиришда ўз ёрдамини таклиф қилмоқчи. Бу ҳақда Евроиттифоқнинг ташқи ишлар ва хавфсизлик сиёсати бўйича олий вакили Жозеп Боррел Евроиттифоқ Ташқи ишлар вазирлари кенгаши мажлиси якунлари бўйича маълум қилди, деб ёзади «ТАСС».
«Вазирлар ‘Толибон’ни сиёсий жараёнда қатнашишга чақирди. Улар, шунингдек, дунё ҳамжамиятини Афғонистонга зарур ёрдамни тақдим этишга даъват қилди. Мен вазиятни кўплаб минтақавий иштирокчилар билан муҳокама қиламан, яқин кунларда Тошкентда бўлиб ўтадиган конференцияда (‘Марказий ва Жанубий Осиё: ўзаро минтақавий боғлиқлик. Таҳдидлар ва имкониятлар’) иштирок этаман, унда Афғонистон президенти ҳам қатнашади. Европа Иттифоқи ғарб ҳарбийлари чиқиб кетганидан кейин мамлакатни барқарорлаштиришда ёрдам таклиф қилмоқчи», — деди Боррел.
АҚШ ва НАТО ўз қўшинларини Афғонистондан олиб кетишни 29 май куни бошлади, ушбу мамлакатда уларнинг ҳарбий операциялари бошланганига қарийб 20 йил бўлди.
Июль ойи бошида «Толибон» ҳаракати Афғонистоннинг Эрон, Тожикистон, Туркманистон, Хитой ва Покистон билан чегаралари яқинида жойлашган туманларини ўз назорати остига олди. Афғонистон Қуролли кучлари янги қўмондони генерал Вали Муҳаммад Аҳмадзой маълум қилишича, мамлакатнинг асосий шаҳарларини, чегара ўтиш пунктлари ва шосселарни «Толибон»дан ҳимоя қилиш армия учун бирламчи вазифа ҳисобланади. Унинг сўзларига кўра, «Толибон» бошлиқлари дастлаб маҳсулотлар олиб ўтиладиган асосий йўлларни тўсиб қўйиб, сўнг шаҳар ва туманларга ҳужум бошламоқчи.
Тошкент шаҳрида ўтказиладиган «Марказий ва Жанубий Осиё: минтақавий боғлиқлик. Таҳдидлар ва имкониятлар» мавзусидаги халқаро конференцияда Афғонистон ва Покистон президентлари, шунингдек, Европа иттифоқининг ташқи ишлар ва хавфсизлик сиёсати бўйича олий вакили, Еврокомиссия вице-президенти Жозеп Боррел, 20 дан зиёд мамлакат ташқи ишлар вазирлари, нуфузли халқаро ва минтақавий ташкилотлар раҳбарлари иштирок этиши кутилмоқда. Иштирокчиларнинг умумий сони 600 дан ортиқ.
Изоҳ (0)