Oliy Majlis Qonunchilik palatasi deputati Rasul Kusherbayev koronavirusga qarshi emlandi. Bu haqda u o‘zining Telegram’dagi kanali orqali ma’lum qildi.
“Bugun ertalabdan to‘g‘ri Yangiyo‘l shahridagi ko‘p tarmoqli markaziy poliklinikaga borib, el qatori koronavirusga qarshi Xitoy—O‘zbekiston hamkorligida yaratilgan ZF-UZ-VAC2001 vaksinasini oldim. Hammasi joyida”, — deb yozadi deputat.
Eslatib o‘tamiz, Sog‘liqni saqlash vazirligi 26-iyun kuni “Men vaksina oldim” aksiyasi boshlanganini e’lon qildi. Aksiya doirasida vazirlik matbuot xizmati deyarli har kuni vaksina olgan yuqori martabali o‘zbekistonliklar haqida axborot berib kelmoqda. Ular orasida katta tibbiyot muassasalari rahbarlaridan tortib, viloyat hokimi-yu vazirlargacha bor.
Xususan, Senat raisi Tanzila Norboyeva, mahalla va oilani qo‘llab-quvvatlash vaziri Rahmat Mamatov “Sputnik V” vaksinasi bilan, xalq ta’limi vaziri Sherzod Shermatov koronavirusga qarshi o‘zbek—xitoy vaksinasi bilan, sobiq sog‘liqni saqlash vaziri Alisher Shodmonov va sog‘liqni saqlash vazirining o‘rinbosari – Toshkent shahar Sog‘liqni saqlash bosh boshqarmasi boshlig‘i Anvar Alimov ZF-UZ-VAC2001 vaksinasi bilan, O‘zbekiston madaniyat vaziri Ozodbek Nazarbekov, maktabgacha ta’lim vaziri Agrippina Shin, Namangan viloyati hokimi Shavkat Abdurazzoqov “Sputnik V” vaksinasi bilan emlandi.
O‘zbekistonda koronavirusga qarshi emlash jarayonlari nisbatan sust ketmoqda. Shu sababli 28-iyundan Toshkent shahrida aholining 18 yoshdan katta bo‘lgan barcha qatlamini davlat budjeti hisobidan ixtiyoriy tarzda ommaviy emlashga ruxsat berildi (keyinroq, iyul oyidan, xuddi shunday tartib Toshkent va Samarqand viloyatlarida, shuningdek, imkoniyatdan kelib chiqib, boshqa hududlarda ham joriy etildi). 28-iyundan Toshkent bozorlari va yirik savdo majmualarida 46 ta qo‘shimcha emlash punktlari paydo bo‘ldi. Toshkent shahrida 8-iyuldan aholini emlash uchun maxsus avtobuslar yo‘lga qo‘yildi.
Izoh (0)