Расул Кушербаев коронавирусга қарши хитой-ўзбек вакцинаси билан эмланди
Олий Мажлис Қонунчилик палатаси депутати Расул Кушербаев коронавирусга қарши эмланди. Бу ҳақда у ўзининг Telegram’даги канали орқали маълум қилди.
«Бугун эрталабдан тўғри Янгийўл шаҳридаги кўп тармоқли марказий поликлиникага бориб, эл қатори коронавирусга қарши Хитой—Ўзбекистон ҳамкорлигида яратилган ZF-UZ-VAC2001 вакцинасини олдим. Ҳаммаси жойида», — деб ёзади депутат.
Эслатиб ўтамиз, Соғлиқни сақлаш вазирлиги 26 июнь куни «Мен вакцина олдим» акцияси бошланганини эълон қилди. Акция доирасида вазирлик матбуот хизмати деярли ҳар куни вакцина олган юқори мартабали ўзбекистонликлар ҳақида ахборот бериб келмоқда. Улар орасида катта тиббиёт муассасалари раҳбарларидан тортиб, вилоят ҳокими-ю вазирларгача бор.
Хусусан, Сенат раиси Танзила Норбоева, маҳалла ва оилани қўллаб-қувватлаш вазири Раҳмат Маматов «Спутник V» вакцинаси билан, халқ таълими вазири Шерзод Шерматов коронавирусга қарши ўзбек—хитой вакцинаси билан, собиқ соғлиқни сақлаш вазири Алишер Шодмонов ва соғлиқни сақлаш вазирининг ўринбосари – Тошкент шаҳар Соғлиқни сақлаш бош бошқармаси бошлиғи Анвар Алимов ZF-UZ-VAC2001 вакцинаси билан, Ўзбекистон маданият вазири Озодбек Назарбеков, мактабгача таълим вазири Агриппина Шин, Наманган вилояти ҳокими Шавкат Абдураззоқов «Спутник V» вакцинаси билан эмланди.
Ўзбекистонда коронавирусга қарши эмлаш жараёнлари нисбатан суст кетмоқда. Шу сабабли 28 июндан Тошкент шаҳрида аҳолининг 18 ёшдан катта бўлган барча қатламини давлат бюджети ҳисобидан ихтиёрий тарзда оммавий эмлашга рухсат берилди (кейинроқ, июль ойидан, худди шундай тартиб Тошкент ва Самарқанд вилоятларида, шунингдек, имкониятдан келиб чиқиб, бошқа ҳудудларда ҳам жорий этилди). 28 июндан Тошкент бозорлари ва йирик савдо мажмуаларида 46 та қўшимча эмлаш пунктлари пайдо бўлди. Тошкент шаҳрида 8 июлдан аҳолини эмлаш учун махсус автобуслар йўлга қўйилди.
