Ijtimoiy tarmoqlarda Olmazor tumanidagi do‘konlardan birining oldida janjal aks etgan videotasvir tarqaldi. Toshkent shahar IIBB axborot xizmati holat bo‘yicha ma’lumot berdi.
Ma’lum qilinishicha, 10-iyul kuni soat 17:05 larda Toshkent shahar Olmazor tumani Usta Olim ko‘chasidagi avtobus bekatida joylashgan do‘konning oldida noma’lum shaxslar hech bir sababsiz 26 yoshli Q.B.ni urib tan jarohati yetkazgan. Oqibatda Q.B. olgan tan jarohatlari bilan kasalxonaga yotqizilgan.
Mazkur jinoyatga aloqador shaxslar tezkorlik bilan aniqlangan. Holat yuzasidan Jinoyat kodeksining 277-moddasi 2-qismi “a”, “b” bandlari (bezorilik, bir guruh shaxslar tomonidan badanga o‘rtacha og‘ir shikast yetkazish) bilan R.S. va boshqalarga nisbatan jinoyat ishi qo‘zg‘atilgan. Hozirda tergov harakatlari davom etmoqda.
“Shuni alohida ta’kidlash kerakki, ayrim fuqarolarning huquqiy bilimga ega bo‘lmagani hamda jinoyat ishini qo‘zg‘atishning protsessual asoslari va tartibini bilmasligi ko‘pincha tushunmovchiliklarga, videotasvirga berilgan sharhdagi kabi asossiz ayblovlarga sabab bo‘lmoqda. Shuning uchun biz fuqarolardan bu kabi ayblovlarga shoshmasliklarini, ayniqsa, voqea yuz berganiga qisqa vaqt o‘tganini, ularning xulosalari xato bo‘lishi mumkinligini inobatga olishlarini so‘rab qolamiz”, — deyiladi poytaxt IIBB munosabatida.
Avvalroq Chiroqchida noma’lum shaxs hokimlik binosi oldida bir qizni kaltaklagani, Toshkentda mast erkak shifokor ayolni kaltaklab, jiddiy jarohat yetkazgani, Samarqandda qizining sha’nini bulg‘ovchi gap-so‘zlarni tarqatgan erkakni kaltaklagan otaga nisbatan jinoyat ishi qo‘zg‘atilgani to‘g‘risida xabar berilgandi.
Izoh (0)