“Manchester Siti” Vinisius Junior bilan muzokara boshladi

Madridning “Real” klubining braziliyalik hujumchisi Vinisius Junior faoliyatini Angliya Premyer Ligasida davom ettirishi mumkin. Ispaniyaning Fichajes nashri xabariga ko‘ra, futbolchiga “Manchester Siti” jiddiy qiziqish bildirmoqda.

Manbaga ko‘ra, “shaharliklar” transfer oynasi yopilishiga qadar 25 yoshli forvardni sotib olishga urinib ko‘radi. Shuningdek, Manchester jamoasi “Real”ning boshqa braziliyalik futbolchisi — Rodrigoni ham o‘z safiga qo‘shib olishga harakat qilmoqda. Sababi yozgi transfer oynasida “Siti”ning bir qancha hujumkor futbolchilari boshqa jamoalarga o‘tishi kutilmoqda. Xususan, Savinyo “Tottenhem” bilan, Jek Grilish esa “Everton” bilan kelishuvga erishgani aytilmoqda. Ushbu xabarlar fonida Pep Gvardiola jamoani ichki chempionat hamda Yevropa Chempionlar Ligasidagi raqobatbardoshligini oshirish uchun “Real”ning ikki yetakchisiga “ko‘z tikkan”.

Vinisius haqidagi mish-mishlar ancha oldin tarqalgan, chunki hujumchi “Real” rahbariyati bilan yangi shartnoma bo‘yicha kelisha olmayapti. Shu bois uning jamoani tark etishi ehtimoli mavjud.

Indykaila News xabariga ko‘ra, ingliz klubi allaqachon Vinisius bilan muzokaralar boshlagan. Ammo hujumchi “Manchester Siti” moliyaviy feyr-pley qoidalarini 115 marta buzganlikda ayblanayotganidan xavotirda. Sababi, agar “shaharliklar”ning aybi isbotlansa, jamoa Chempionshipga tushirib yuborilishi mumkin. Mazkur holat futbolchini biroz o‘ylantirmoqda.

📍Exclusive: Vinícius Júnior looks like he’s been in secret talks with Manchester City.

The @realmadrid star is considering a move away from Real Madrid 💣

The player does have concerns with all the uncertainty surrounding those 115 charges against @ManCity,

it’s no surprise… pic.twitter.com/wvxlCrAFZ0

— indykaila News (@indykaila) August 11, 2025

• Vinisius o‘tgan mavsumda jamoa safida 58 ta o‘yinda maydonga tushib, 22 ta gol urgan va 19 ta golli uzatma bergan.
• Braziliyalik hujumchi 2018-yil yozidan beri “Real” safida to‘p surmoqda. Uning klub bilan amaldagi shartnomasi 2027-yil iyun oyining oxirida yakunlanadi.
• Vinisiusning bozor qiymati 170 million yevroga baholanmoqda.