9-iyul kuni Toshkent viloyati IIBB Patrul-post xizmati va jamoat tartibini saqlash boshqarmasi Karantin tadbirlarini ta’minlash bo‘linmasi xodimlari tomonidan sifatsiz go‘sht mahsulotlari yo‘q qilindi. Bu haqda viloyati IIBB axborot xizmati xabar berdi.
Ma’lum qilinishicha, Yangiyo‘l tumani “Niyozbosh” mahallasi M.Karimov ko‘chasi raqamsiz uyda yashovchi 1983-yilda tug‘ilgan A.T. xonadonida veterinariya mutaxassislari bilan birgalikda uy hayvonlarini profilaktik emlash maqsadida kirilgan va xonadonning molxonasi yonidagi bo‘sh xonada to‘rtta qopda kelib chiqishi noma’lum bo‘lgan go‘sht mahsuloti borligi aniqlangan.
Fuqaro T.A.dan kelib chiqishi noma’lum bo‘lgan go‘sht mahsulotlarini nima sababdan saqlayotgani so‘ralganda u baliq boqishuni va go‘sht mahsulotini baliqlarga berishini ma’lum qilgan.
Ushbu kelib chiqishi noma’lum bo‘lgan go‘sht mahsulotlarini Yangiyo‘l tumani “E.Qovunchi” mahallasi hududida joylashgan chiqindi yig‘ish maydoniga olib borilib, veterinariya mutaxassislari ishtirokida yoqish yo‘li bilan yo‘q qilingan.
Fuqaro A.T.ga nisabtan veterinariya-sanitariya qoidalariga zid ravishda go‘sht mahsulotini saqlagani uchun veterinariya xodimlari tomonidan Ma’muriy javobgarlik to‘g‘risidagi kodeksning 109-moddasiga (veterinariya, veterinariya-sanitariya qoidalari va normalarini buzish) asosan ma’muriy bayonnoma rasmiylashtirilgan.
Avvalroq Chorsu bozorida sifatsiz go‘sht mahsulotlari sotish bilan shug‘ullanib kelayotgan shaxs aniqlangani, Qarshidan Toshkentga 500 kiloga yaqin noma’lum hayvonga tegishli go‘sht olib ketilayotgani avtomobil to‘xtatilgani, Buxoroda qo‘lbola tayyorlangan iste’molga yaroqsiz yog‘ mahsulotini sotayotgan shaxs qo‘lga olingani haqida xabar berilgandi.
Izoh (0)