Afg‘oniston prezidenti Ashraf G‘ani va Pokiston bosh vaziri Imron Xon tashrif bilan 15—16-iyul kunlari O‘zbekistonda bo‘ladi. Bu haqda 12-iyul, dushanba kuni o‘tkazilgan brifingda Prezident matbuot kotibi Sherzod Asadov so‘z yuritdi, deya xabar bermoqda “Daryo” muxbiri.
Ta’kidlanishicha, Pokiston yetakchisi rasmiy tashrif bilan, Afg‘oniston rahbari esa Toshkent shahrida o‘tkaziladigan “Markaziy va Janubiy Osiyo: mintaqaviy bog‘liqlik. Tahdidlar va imkoniyatlar” mavzusidagi xalqaro konferensiya doirasida amaliy tashrif bilan kelmoqda.
“Ushbu konferensiya, shubhasiz, joriy haftaning eng muhim tadbiri bo‘ladi. Avval qayd etilganidek, Afg‘oniston va Pokiston prezidentlari, shuningdek, Yevropa ittifoqining tashqi ishlar va xavfsizlik siyosati bo‘yicha oliy vakili, Yevrokomissiya vitse-prezidenti Jozep Borrel, 20 dan ziyod mamlakat tashqi ishlar vazirlari, nufuzli xalqaro va mintaqaviy tashkilotlar rahbarlari ishtirok etishi kutilmoqda. Ishtirokchilarning umumiy soni 600 dan ortiq.
Prezident Shavkat Mirziyoyev tashabbusi bilan o‘tkazilayotgan konferensiya Markaziy va Janubiy Osiyo davlatlari o‘rtasidagi do‘stona aloqalar, ishonch va yaxshi qo‘shnichilik munosabatlarini mustahkamlashga qaratilgan”, — dedi Asadov.
Uning qayd etshicha, xalqaro tadbirda BMT bosh kotibi Antoniu Guterrish ishtirokchilarga videomurojaat yo‘llaydi.
“Yalpi va sho‘ba majlislarida mintaqaviy bog‘liqlikni yanada chuqurlashtirish imkoniyatlari, shu jumladan, savdo va transport sohalaridagi hamkorlikning barqaror o‘sishni ta’minlashdagi o‘rni, madaniy-gumanitar aloqalarni qayta tiklash orqali do‘stlik va o‘zaro ishonchni mustahkamlash, mintaqaviy xavfsizlik sohasidagi tahdid va xatarlar muhokama qilinadi.
Bundan tashqari, davlat rahbari Afg‘oniston va Pokiston prezidentlari, Xitoy, Rossiya, Hindiston, Saudiya Arabistoni, Turkiya, Bangladesh, Markaziy Osiyo davlatlari va boshqa mamlakatlar tashqi ishlar vazirlari, shuningdek, AQSh prezidentining Ichki xavfsizlik masalalari bo‘yicha maslahatchisi Elizabet Shervud-Rendall va Yevropa Ittifoqi tashqi siyosiy idorasi rahbari Jozep Borrel bilan ikki tomonlama uchrashuvlar o‘tkazishi rejalashtirilgan”, — dedi davlat rahbari matbuot kotibi.
Bundan tashqari, joriy hafta Shavkat Mirziyoyev raisligida qator hududlarda nasos stansiyalarini modernizatsiya qilish yuzasidan yig‘ilish ham o‘tkaziladi.
Izoh (0)