Telegram messenjeridagi kanallarda Toshkent davlat tibbiyot universiteti talabalarining videomurojaati eʼlon qilindi. Unda talabalar majburiy ravishda Rossiyaning Nijniy Novgorod shahriga, harbiy holat eʼlon qilingan hududga o‘qishga yuborilayotganini aytib, prezidentdan yordam so‘raydi.
Biz Toshkent tibbiyot akademiyasining Rossiyadagi Privoljskiy tibbiyot universiteti bilan ikki diplom dasturi asosida taʼlim olayotgan beshinchi bosqich talabalarimiz. Biz uchun bu so‘nggi kurs hisoblanadi. Hozirgi xavfsizlik vaziyati va oilaviy sharoitlar tufayli 40 nafardan ziyod talabalar Rossiyaga borish imkoniyatiga ega emas. Ayni paytda bizga faqat ikki yo‘l taklif qilinmoqda: Rossiyaga borish yoki akademik taʼtilga chiqish, deydi talabalar davlat rahbariga murojaat qilar ekan.
Murojaatchilar muammoga yechim topish maqsadida prorektorga bir necha marotaba murojaat qilganini, ammo natija yo‘qligini aytadi.
Sizdan iltimos qilamiz, bizga beshinchi bosqichni O‘zbekistonda yakunlash imkoniyatini bering, deydi ular.
Mazkur videomurojaatga eʼtibor qaratgan oliygoh masʼullari Toshkent davlat stomatologiya instituti talabalarining majburan harbiy harakatlar hududiga yuborilayotganini rad qildi.
Mazkur holatda tilga olinayotgan barcha talabalar hamkorlikdagi qo‘shma taʼlim dasturiga o‘qishga qabul qilingan. Bunga ko‘ra, ular o‘z o‘qishlarini xorijdagi hamkor oliy taʼlim muassasasida davom ettirishlari shart hisoblanadi. Har bir talabalar bilan shartnoma tuzilgan bo‘lib, unga muvofiq ular 4- va 5-kursni Rossiyaning Nijniy Novgorod shahrida joylashgan Privoljskiy tibbiyot tadqiqot universitetida (PIMU) o‘qib tugatish majburiyatini olgan. Hozirda PIMU O‘zbekistonning 5 ta oliy o‘quv yurti bilan 12 ta hamkorlikdagi dasturni amalga oshirmoqda. Ushbu dasturlar doirasida bugungi kunda 400 dan ortiq O‘zbekiston fuqarosi PIMU bazasida kunduzgi shaklda o‘qimoqda, deyiladi masʼullar raddiyasida.
Qo‘shimcha qilinishicha, talabalar uchun qulay sharoitlar yaratish maqsadida Toshkent davlat tibbiyot universiteti rektori Boymurodov PIMU rektori Karyakin bilan bir nechta kelishuvlarni amalga oshirgan.
Hamkorlik dasturi bo‘yicha o‘qiyotgan barcha o‘zbekistonlik talabalar uchun alohida yotoqxona ajratish, ilgari shartnoma shartlarini bajarmagan va PIMU tomonidan o‘qishdan chetlashtirilgan talabalar uchun akademik yilni yo‘qotmasdan o‘qishga qayta tiklanish imkoniyatini yaratish, PIMU tomonidan hamkorlik dasturi talabalari uchun ularni qo‘llab-quvvatlovchi — yaʼni aeroportdan kutib olib, Rossiyada yashash uchun zarur barcha hujjatlarni rasmiylashtirishda yordam beradigan dekanat faoliyatini yuritishga kelishib olingan, deyiladi OTM bayonotida.
Qo‘shimcha qilinishicha, Vazirlar Mahkamasining 421-son qaroriga asosan ushbu qo‘shma taʼlim dasturlariga o‘qishga qabul qilish bo‘yicha kirish imtihonlari yengillashtirilgan holda amalga oshirilgan va talabalarning o‘qishini Qozog‘istonga ko‘chirish haqidagi maʼlumotlar asosli emas.
Bundan tashqari Nijniy Novgorod shahri haqida tarqatilgan “harbiy holat eʼlon qilingan hudud” degan maʼlumot ham asossizdir. Rossiya Federatsiyasining mazkur hududida rasmiy tartibda harbiy holat eʼlon qilinmagan. Ushbu shahar universitet bilan ilmiy va taʼlimiy hamkorlik qilayotgan sherik oliy taʼlim muassasalari joylashgan hudud hisoblanadi. 2025-yil 11-avgust kuni Toshkent davlat tibbiyot universiteti rektori Sh.Boymuradov ushbu qo‘shma taʼlim dasturida tahsil olayotgan har bir talaba va ularning ota-onalari bilan uchrashuv o‘tkazdi. Uchrashuv davomida talabalarni hamkor PIMUda o‘qishni davom ettirish uchun jo‘nab ketishi, u yerda yaratilgan shart-sharoitlar va talabalar turar joyi bilan taʼminlash bo‘yicha batafsil maʼlumotlar berildi. Dastur ishtirokchilarining asosiy qismi PIMUda taʼlimni davom ettirish istagini bildirib, ulardan aksariyati jo‘nab ketishga tayyor ekanini bildirdi. Faqat ayrim talabalar shartnoma shartlarini buzgan va ataylab yolg‘on maʼlumotlarga tayangan holda, Toshkentda qolishga harakat qilmoqda, deydi masʼullar.
Izoh (0)