Amerikalik xonanda Madonna Instagram’da e’lon qilgan murojaatida pontifikni G‘azoga borishga da’vat qildi, deb yozadi CNN nashri.
“Papa hazratlari, iltimos, G‘azoga keting va o‘z nur-u umidingizni bolalarga olib boring, toki kech bo‘lmasin. Ona sifatida ularning azobini ko‘rishga ortiq chiday olmayman. Axir, dunyodagi bolalarning bari hammamizga tegishli. Aynan siz kirishiga hech kim to‘sqinlik qila olmaydigan yagona odamsiz!”
Bundan avval Madonna o‘g‘li Rokkoning tug‘ilgan kuni munosabati bilan yozilgan postda ham unga bera oladigan eng yaxshi sovg‘a “G‘azoda urushda qolgan begunoh bolalarni qutqarish uchun qo‘ldan kelgancha yordam berishni so‘rash” ekanini aytgan edi.
Rim Papasi may oyida ushbu lavozimga saylanganidan beri G‘azodagi urushni keskin tanqid qilib keladi va Isroil bombardimoni ostida qolgan falastinlik tinch aholining ahvoli haqida qayg‘urganini bildiradi. Joriy yil iyul oyida u shunday degandi:
“Men G‘azodagi og‘ir gumanitar vaziyatni katta xavotir bilan kuzatyapman. Tinch aholining ochlikdan aziyat chekayotgani, zo‘ravonlik va o‘lim xavfi ostida qolayotgani meni tashvishga solmoqda”.
UNICEF ma’lumotiga ko‘ra, 2023-yil oktyabrida urush boshlanganidan beri G‘azoda 18 mingdan ortiq bola halok bo‘lgan. O‘tgan haftada tashkilot har kuni o‘rtacha 28 nafar bola o‘ldirib ketilayotganini ma’lum qilgan.
JSST bosh direktori Tedros Adhanom Gebreyesus dushanba kuni Madonnaning postiga javoban uning “hamdardligi, birdamligi va bolalar uchun g‘amxo‘rlikka chaqirayotgani” uchun minnatdorlik bildirdi.
Falastin sog‘liqni saqlash vazirligi ma’lumotiga ko‘ra, urush boshlanganidan beri kamida 222 kishi, jumladan 101 nafar bola ochlikdan nobud bo‘lgan. Isroil esa anklavga keladigan gumanitar va tibbiy yordam hamda turli xodimlar kirishini qat’iy nazorat qiladi. Shu sababli G‘azodagi ocharchilik muammosi yanada chuqurlashdi, ozib ketgan bolalarning suratlari butun dunyoda xavotir uyg‘otdi.
“Bu begunoh bolalarni qutqarish uchun gumanitar eshiklarni to‘liq ochishimiz kerak. Vaqtimiz juda oz. Iltimos, boraman, deb ayting”, deya murojaat qildi Madonna Rim papasiga.
Isroil bosh vaziri Benyamin Netanyaxu hukumati papaga anklavga kirishga ruxsat berish yoki bermaslik masalasi esa noma’lumligicha qolmoqda.
Izoh (0)