Ҳозирда Канадада ўрмонларнинг йўқ бўлиб кетиш муаммоси долзарблигича қолмоқда, ҳатто мамлакатни шимолий яримшар Бразилияси деб ҳам аташади. Шу сабаб бу ерда технология ёрдамида ўрмонларни тиклаш ғоясининг пайдо бўлиши ажабланарли ҳол эмас.
Flash Forest компанияси томонидан дарахт экиш учун махсус дрон яратилди. Бугунги кунда компания бутун бошли учувчисиз қурилмаларга эга: уларнинг баъзилари дарахт экса, бошқалари уларни суғориш ва парваришлаш билан шуғулланади.
Компания салкам икки йил олдин ташкил этилган. Улар дастлаб дронларни синовдан ўтказиб, қўниш техникасини ишлаб чиқишди. Натижа эса ҳайратланарли — ўтган икки ой ичида 20 кишидан иборат жамоа дронлар ёрдамида бутун Канада бўйлаб 300 минг туп кўчат экишга муваффақ бўлди.
Уруғларни экиш схемаси энг кичик деталларга қадар такомиллаштирилган ва ажабланарлиси шундаки, у амалда инсон иштирокисиз, аммо самарали ишлайди. Дастлаб белгиланган ҳудуд сканерлайдиган ва қўниш учун қулай жойларни аниқлайдиган дрон ёрдамида ўрганилади. Кейин пневматик отиш мосламаси билан жиҳозланган «экувчи дронлар» юборилади. Улар аниқ ҳисобланган куч билан ҳар бир уруғни оптимал чуқурликка қадар отади.
Қурилмага нафақат уруғ, балки ёш ўсимликнинг илдиз олишига ёрдам берадиган озуқавий қўшимчалар ҳам юкланади. Уруғ экиб бўлингач, бошқа дронлар тупроққа қўшимча озуқаларни сепиб чиқади. Жараён шу билан тугамайди: дронлар кўчатларнинг ўсишини кузатиб боради ва барча маълумотларни компьютерларга узатади.
Такомиллаштирилган тизим ёрдамида Flash Forest дронлари бир кунда 10 мингга яқин дарахт уруғларини экишга қодир. Дронлар ёрдамида экиш қўлда ишлашга қараганда анча қулай, тезроқ ва арзонроқ.
Ҳозирда биологик хилма-хилликни сақлаб қолиш учун турли хил дарахтлар билан тажриба ўтказилмоқда ва ўрмонларни қайта тиклашнинг ушбу усули Канададан бошқа мамлакатларда ҳам қизиқиш уйғотишига умид қилинмоқда.
Изоҳ (0)