Xiaomi kompaniyasi o‘zining Youpin kollektiv moliyalashtirish maydonchasida yangi mahsulotini taqdim etdi. Gap yorug‘lik diodli fonar bilan jihozlangan, avtomatik ravishda qayta yig‘iluvchi soyabon haqida ketmoqda, deb xabar beradi IXBT.
Soyabonni Xiaomi tomonidan qo‘llab-quvvatlanuvchi Urevo kompaniyasi ishlab chiqaradi. Bir soniyada ochiladigan qurilma 11 dollar evaziga sotuvga chiqishi kutilmoqda. Fonar 10 metrgacha uzoqlikni yoritishga qodir uchta yorug‘lik diod bilan jihozlangan. Soyabon tutqichiga o‘rnatilgan fonarning og‘ish burchagini osonlikcha boshqarish mumkin — shu orqali ham ketayotgan yo‘lni yoritsa, ham yomg‘irdan himoyalansa bo‘ladi.
Soyabonni ochish va yopish bitta tugmani bosish orqali amalga oshiriladi. Yig‘ilgan holatda soyabon tutqichiga suv oqmaydi, foydalanuvchi soyabonda qolgan suvlarni uni burib, to‘kib tashlashi mumkin.
Ishlab chiqarishda gidrofob qoplamali zichligi 210T ga teng matodan foydalaniladi. Yomg‘ir suvlari tomchi shakliga kirib, tezda soyabondan oqib ketadi. Mato ultrabinafsha nurlarni 99 foiz samaradorlikda bloklashga qodir. Ichki qismi vinil qoplamaga ega bo‘lib, yorug‘lik va issiqlikni bloklaydi.
Soyabon karkasi mustahkam shisha toladan ishlangan va u kuchli yog‘ingarchilik hamda shamolga bardoshli.
Izoh (0)