Rossiyaning Illusion startapi televizor yoki kinoteatr ekranida uzatilayotgan filmlardan kelib chiqib, ma’lum bir hidni taratishga qodir Aroma gadjetini yaratdi, deb xabar beradi “Afisha.uz”.
Qurilma portativ kolonka shaklida yaratilgan. Aroma ichida to‘rtta baraban joylashgan bo‘lib, ularning har birida turli hidlarga ega yettitadan kartrij o‘rin olgan. Televizorga ulanish Bluetooth orqali amalga oshiriladi.
“Biz ovozli yo‘lak kabi hidlar yo‘lagi texnologiyasini taqdim etamiz. Ushbu hidlar xuddi ovoz kabi film bo‘yicha taraladi. Ko‘plab hidlarni ranglar palitrasi kabi aralashishini ta’minlashni rejalashtirganmiz. Yuzdan ortiq filmlarning sahnalarini tahlil qilib chiqib, kutubxonadan, albatta, o‘rin oladigan toza hidlarni ajratib oldik. Masalan, qahva va endigina pishgan pishiriq ifori”, — deydi loyiha rahbari Ilya Finatov.
Dastlabki foydalanuvchilar filmlarga kerakli hid yo‘lagini o‘zi mustaqil qo‘shadi. Hozirda tahlil qilingan va ma’lum bir iforni taqdim etishga dasturlashtirilgan filmlar maxsus mobil dasturga yig‘ilgan. Kelajakda ushbu jarayonni neyrotarmoqlar yordamida avtomatlashtirish reja qilinmoqda.
Illusion Aroma’ning sotuvga chiqish sanasi va narxi e’lon qilinmagan.
Avvalroq Yangi Zelandiyada “ozishga yordam beradigan dunyodagi ilk qurilma” yaratilgani, Tel-Avivdagi universitet tadqiqotchilari esa dunyodagi eng mitti elektron qurilmani yaratgani to‘g‘risida xabar berilgandi.
Izoh (0)