Rossiyaning Kamchatka o‘lkasida halokatga uchragan An-26 samolyotidagi barcha yo‘lovchilar va ekipaj a’zolarining jasadi topildi, deb yozadi Meduza. Samolyot bortida jami 28 kishi bo‘lgan.
Hududning sanitariya aviatsiyasi vakillari ma’lum qilishicha, jasadlar ekspertizaga yuboriladi.
Shuningdek, 9-iyul kuni ertalab An-26 reysidagi parvoz ma’lumotlarini avtomatik yozib oluvchi “qora quti”larning ikkalasi ham topilgani ma’lum bo‘ldi. Dastlabki ma’lumotlarga ko‘ra, “qora quti”larning biriga jiddiy zarar yetmagan, ikkinchisida axborotlarni qayta ishlash va saqlash blogi yo‘qolgan.
“Yo‘qolgan bloksiz uni ochib bo‘lmaydi”, — deb xabar berdi Palana posyolkasi ma’muriyati.
Qutilarning qaysi biriga — nutq yoki parametrli qutiga zarar yetgani noma’lum.
Eslatib o‘tamiz, 6-iyul kuni Petropavlovsk-Kamchatskiy shahridan Palana posyolkasiga yo‘lovchi parvozini amalga oshirayotgan An-26 samolyoti dengizga qulagan edi. Samolyotdagi yo‘lovchilar ro‘yxatida Palana posyolkasi rahbari Olga Moxireva, Palana ma’muriyati safarbarlik bo‘limi boshlig‘i Aleksandr Andreykin va uning rafiqasi, ma’muriyat moliya bo‘limi boshlig‘i Olga Andreykina ham bo‘lgan.
Halokatdan so‘ng Rossiyada uch kunlik motam e’lon qilindi. Dastlab qutqaruvchilar samolyot qulab tushishi oqibatida halok bo‘lgan olti kishining jasadini topishga muvaffaq bo‘ldi, ular suvdan chiqarib olindi.
Halok bo‘lganlarning oilalariga sug‘urta to‘lovlari taqdim etiladi: samolyotga egalik qilgan “Kamchatka aviakorxonalari” tomonidan 1 million rubldan (taxminan, 13,4 ming dollar), o‘lka budjetidan esa 500 ming rubldan (taxminan, 6,7 ming dollar) ajratiladi.
“TASS” xabar berishicha, An-26 samolyoti 1982 -yildan beri ishlab keladi va uning uchishga yaroqliligi to‘g‘risidagi sertifikat muddati 2021-yil 30-avgustda tugaydi.
Izoh (0)