Россиянинг Камчатка ўлкасида ҳалокатга учраган Ан-26 самолётидаги барча йўловчилар ва экипаж аъзоларининг жасади топилди, деб ёзади Meduza. Самолёт бортида жами 28 киши бўлган.
Ҳудуднинг санитария авиацияси вакиллари маълум қилишича, жасадлар экспертизага юборилади.
Шунингдек, 9 июль куни эрталаб Ан-26 рейсидаги парвоз маълумотларини автоматик ёзиб олувчи «қора қути»ларнинг иккаласи ҳам топилгани маълум бўлди. Дастлабки маълумотларга кўра, «қора қути»ларнинг бирига жиддий зарар етмаган, иккинчисида ахборотларни қайта ишлаш ва сақлаш блоги йўқолган.
«Йўқолган блоксиз уни очиб бўлмайди», — деб хабар берди Палана посёлкаси маъмурияти.
Қутиларнинг қайси бирига — нутқ ёки параметрли қутига зарар етгани номаълум.
Эслатиб ўтамиз, 6 июль куни Петропавловск-Камчацкий шаҳридан Палана посёлкасига йўловчи парвозини амалга ошираётган Ан-26 самолёти денгизга қулаган эди. Самолётдаги йўловчилар рўйхатида Палана посёлкаси раҳбари Ольга Мохирева, Палана маъмурияти сафарбарлик бўлими бошлиғи Александр Андрейкин ва унинг рафиқаси, маъмурият молия бўлими бошлиғи Ольга Андрейкина ҳам бўлган.
Ҳалокатдан сўнг Россияда уч кунлик мотам эълон қилинди. Дастлаб қутқарувчилар самолёт қулаб тушиши оқибатида ҳалок бўлган олти кишининг жасадини топишга муваффақ бўлди, улар сувдан чиқариб олинди.
Ҳалок бўлганларнинг оилаларига суғурта тўловлари тақдим этилади: самолётга эгалик қилган «Камчатка авиакорхоналари» томонидан 1 миллион рублдан (тахминан, 13,4 минг доллар), ўлка бюджетидан эса 500 минг рублдан (тахминан, 6,7 минг доллар) ажратилади.
«ТАСС» хабар беришича, Ан-26 самолёти 1982 йилдан бери ишлаб келади ва унинг учишга яроқлилиги тўғрисидаги сертификат муддати 2021 йил 30 августда тугайди.
Изоҳ (0)