Qozog‘istonda issiq havo bo‘yicha 30 yillik rekord yangilandi. Eng yuqori havo harorati 29-iyun kuni mamlakat g‘arbida qayd etilgan. Yozning birinchi oyida yana qanday rekordlar qayd etilgani haqida Qozog‘iston gidrometeorologiya sinoptiklari Tengrinews’ga ma’lum qildi.

Issiqlik rekordlari

Meteorologlarning ta’kidlashicha, yozning birinchi oyi o‘z qarama-qarshiliklar bilan hayratga soldi. Oyning ko‘p qismida mamlakatning butun g‘arbiy yarmi, shuningdek respublikaning janubiy viloyatlari anomal issiqlikni keltirib chiqaradigan subtropik havo massalari ta’sirida bo‘ldi. Ba’zi kunlarda termometr ustunlari 40— 46 darajaga yetdi.

Shunday qilib, mamlakatning janubi-g‘arbiy yarmidagi bir qator meteorologik stansiyalarda kunlik rekordlar qayd etildi:

• 29-iyun kuni Uralsk meteorologiya stansiyasida harorat 41,9 darajani tashkil etdi, bu 2015-yildan (39,8) buyon eng yuqori ko‘rsatkich;
• 29-iyun kuni Oqquduq meteorologiya stansiyasida 44,4 daraja qayd etildi, bu 2018-yildan (43,3) buyon eng yuqori ko‘rsatkich;
• 28-iyun kuni Atirau meteorologiya stansiyasida harorat 42,8 darajani tashkil etdi, bu 2015-yildan (39,8) buyon eng yuqori daraja;
• 29-iyun kuni Qorato‘be (G‘arbiy Qozog‘iston viloyati) meteorologiya stansiyasida eng yuqori havo harorati qayd etildi— 45,5 daraja, bu 1991-yildan (41,2) buyon eng yuqori ko‘rsatkich.

Mamlakatning sharqiy yarmida, aksincha, shimoliy dengiz mintaqalaridan sovuq havo massalari ta’siri natijasida salqin va beqaror ob-havo hukm surdi, yomg‘ir yog‘di, sekundiga 15-28 metrgacha shamol esdi. Ayrim hududlarda shamol sekundiga 30-33 metrga yetgan.

3-iyun kuni Oqmola viloyatidagi Korgaljin meteorologiya stansiyasida juda kuchli yomg‘ir qayd etildi — 53 millimetr (oylik me’yor 34 millimetr), Olmaota viloyatining Jalanash meteorologiya stansiyasida diametri 22 millimetr bo‘lgan do‘l yog‘di.

G‘arbiy va janubiy viloyatlarda tez-tez chang bo‘roni kuzatilib turdi, ularda 200-500 metrgacha masofani ko‘rish darajasi yomonlashgan. Qozog‘iston shimolida 5-6 iyun kunlari tunda 1-2 darajagacha sovuq bo‘lgan, kunduzi esa termometr ustunlari 11-19 darajagacha ko‘tarilgan.

Poytaxtda

Mamlakat poytaxti Nur-Sultonda ob-havo bo‘yicha rekordlar qayd etilmagan, ammo 5-iyunda eng past havo harorati qayd etilgan — 2,9 daraja iliq. Ushbu kun uchun mutlaq minimal ko‘rsatkich 1971-yilda qayd etilgan —1,5 daraja sovuq.

Poytaxtda eng yuqori havo harorati 2021-yil 17-iyunda kuzatilib, 34,2 darajani tashkil etdi, ushbu kun uchun mutlaq maksimal harorat 1988-yilda qayd etilgan — 37,6 daraja. Oylik yog‘ingarchilik 21,4 metrni tashkil etdi, me’yor esa 37 metr.