Gaiti prezidenti Jovenel Moizni o‘ldirgan qurolli otryad tarkibida kamida 26 nafar Kolumbiya fuqarosi va kelib chiqishi gaitilik ikki nafar AQSh fuqarosi bo‘lgan. Bu haqda Gaiti politsiyasi boshlig‘i Leon Sharlga tayanib, Associated Press xabar berdi.
Gaiti xavfsizlik kuchlari yollanma qotillar poytaxt Port-o-Prens chetidagi uyda yashiringanini aniqlashga muvaffaq bo‘ldi. Ularni zararsizlantirish chog‘idagi otishma tungacha davom etib, 8-iyul kuni gumonlanuvchilarning bir qismi hibsga olindi.
Hammasi bo‘lib 15 nafar kolumbiyalik va ikki amerikalik hibsga olingan. Uch kishi politsiya tomonidan o‘ldirilgan, yana sakkiz kishi qochib ketgan. Avvalroq Moizning qarorgohiga uyushtirilgan hujum ishtirokchilaridan to‘rt kishi o‘ldirilgani haqida xabar berilgandi.
Kolumbiya mudofaa vaziri Gaiti prezidentini o‘ldirishda gumonlanuvchilarning kamida olti nafari iste’fodagi harbiy xizmatchilar bo‘lganini aytib, tergov ishlarida yordam berishni va’da qildi.
AQSh Davlat departamenti Amerikaning ikki fuqarosi Gaitida hibsga olinganidan xabardorligini ma’lum qilib, Gaiti hukumati tergov olib borayotgani sababli hibsga olinganlarning fuqaroligini tasdiqlay olmasligini aytdi va qo‘shimcha izoh berishdan bosh tortdi. Ma’lum bo‘lishicha, amerikaliklardan biri o‘zini Port-o-Prensdagi Kanada elchixonasining sobiq qo‘riqchisi deb atagan.
Gaiti bosh vaziri vazifasini bajaruvchi Klod Jozef yangi saylovlar o‘tkazilgunga qadar mamlakat rahbari bo‘lib qoladi.
Bu haqda Birlashgan Millatlar Tashkilotining Gaitidagi maxsus vakili Xelen La Laym ma’lum qildi. U, shuningdek, Jozefning hokimiyati qonuniyligini tan oladigan va rad etadigan tomonlardan nizolarni keyinga qoldirishni so‘radi.
“Manfaatdor tomonlar o‘zaro kelishmovchiliklarni chetga surib, oldinga boradigan yo‘lni belgilab olishi va ushbu qiyin davrdan tinch yo‘l bilan o‘tishi kerak”, — dedi La Laym.
Ta’kidlanishicha, 7-iyul kuni Klod Jozef hukumatning qotillikka munosabatini boshqarish, xorijiy hukumatlardan yordam so‘rab murojaat qilish va favqulodda holat e’lon qilish uchun vaziyat yuzasidan mas’uliyatni o‘z zimmasiga oldi.
Eslatib o‘tamiz, Gaiti prezidenti Jovenel Moiz 7-iyulga o‘tar kechasi otib o‘ldirildi. Port-o-Prensdagi prezident qarorgohiga qurolli shaxslar hujum qilgan. Hujumda prezidentning rafiqasi Martin Moiz ham o‘q yeb yaralangan. Shundan so‘ng Gaiti hukumati mamlakatda harbiy holat e’lon qildi.
Izoh (0)