AQSh Afg‘onistondan o‘z qo‘shinlarini olib chiqqanidan keyin ham Afg‘onistonda va boshqa mintaqalarda terrorizmga qarshi kurashish imkoniyatiga ega bo‘ladi. Bu haqda Pentagon vakili Jon Kirbi aytib o‘tdi, deb yozmoqda “Interfaks”.
Ushbu imkoniyatlar orasida u Yaqin Sharqdagi bazalarni eslatib o‘tdi va ular yordamida mintaqada uchuvchili va uchuvchisiz havo vositalaridan foydalanish mumkinligini aytdi. Shuningdek, Afg‘oniston yaqinidagi aviatashuvchi zarba guruhi qo‘shimcha imkoniyatlarni taqdim qilishda davom etmoqda. Shu bilan birga, Kirbining so‘zlariga ko‘ra, AQSh Afg‘onistonga qo‘shni davlatlarning hududlaridan foydalangan holda “qo‘shimcha imkoniyatlarni o‘rganishda” davom etadi. Uning ta’kidlashicha, bu bilan AQSh Markaziy qo‘mondonligi rahbari general Frenk Makkenzi, davlat departamenti va davlat kotibi Entoni Blinken shaxsan shug‘ullanmoqda.
“Ammo menda bu masala bo‘yicha bugun xabar berishim mumkin bo‘lgan birorta imzolangan bitim yo‘q”, — dedi Kirbi.
“Biz taraqqiy etyapmiz, bu borada juda qattiq mehnat qilyapmiz. Ammo Amerika xalqi vataniga ta’sir ko‘rsatadigan terrorchilik tahdidlariga qarshi kurashni davom ettirish uchun bizda haqiqatan ishonchli, istiqbolli imkoniyatlar borligiga ishonch hosil qilishini istayman”, — deya ta’kidladi u.
Matbuot kotibining so‘zlariga ko‘ra, Afg‘onistonda “Tolibon” “o‘nlab tuman markazlarini egallab olgani bu haqiqat”. Uning ta’kidlashicha, shuning uchun “ushbu harbiy mojaroni muzokaralar orqali siyosiy yo‘l bilan hal qilishni davom ettirish juda muhim”.
AQSh prezidenti Jo Bayden AQSh qo‘shinlarini Afg‘onistondan olib chiqish jarayoni 31-avgustda tugashini ma’lum qilgandi. Uning ta’kidlashicha, AQSh qo‘shinlarini olib chiqish jarayoni “xavfsiz va tartibli” bormoqda. Bayden Amerika harbiylari o‘z zimmasiga yuklangan vazifalarini bajarib bo‘lganini aytdi.
Dastlab AQSh qurolli kuchlarini olib chiqib ketish 2021-yil 11-sentabrgacha yakunlanishi rejalashtirilgan edi. Keyinchalik bu jarayon kutilganidan tezroq ketayotgani va shuning uchun avgust oyida tugashi mumkinligi ma‘lum bo‘ldi.
Baydenning ta’kidlashicha, kuchlarni olib chiqish jarayonining tez borishi missiya AQSh harbiylari uchun iloji boricha xavfsizroq bajarilishiga imkon beradigan zaruratdir.
Bayden qo‘shinlar ketgach, Afg‘onistondagi hokimiyat tepasiga “Tolibon”ning kelishini muqarrar deb bilmasligini aytdi. Uning so‘zlariga ko‘ra, Kobulning ixtiyorida 300 ming kishilik qo‘shin bor, ularga qarshi “Tolibon” a’zolari esa 75 mingga yaqin kishini tashkil qiladi. AQSh prezidentining so‘zlariga ko‘ra, afg‘on armiyasi “yaxshi qurollangan, tayyorgarligi yuqori va jang qilishga qodir”.
Afg‘onistondan NATO qo‘shinlarini olib chiqish 29-aprelda boshlangan, AQSh va “Tolibon” o‘rtasida tuzilgan kelishuvga binoan jarayon kuzda yakunlanishi kerak.
Avvalroq “Tolibon” barcha chet el qo‘shinlari Afg‘onistonni o‘z muddatida tark etishini talab qilgani haqida xabar berilgandi. AQSh Afg‘onistondan o‘z qo‘shinlarini olib chiqish amaliyoti avgust oxiriga qadar tugashini ma’lum qildi.
Bugunga qadar Germaniya va Italiya Afg‘onistondan o‘z qo‘shinlarini olib chiqishni yakunladi.
Izoh (0)