Vazirlar Mahkamasi qarori bilan transport vositalari uchun utilizatsiya yig‘imini undirish, qaytarish va undan foydalanish tartibi to‘g‘risidagi nizom tasdiqlandi. Bu haqda Davlat soliq qo‘mitasi xabar qildi.
Transport vositalarining mahalliy ishlab chiqaruvchisi hisobot oyidan keyingi oyning 20-sanasidan kechiktirmay soliq organiga faqat O‘zbekistonda sotish uchun ishlab chiqarilgan transport vositalari bo‘yicha utilizatsiya yig‘imi hisob-kitoblarini elektron shaklda taqdim etadi va sotilgan transport vositalari bo‘yicha utilizatsiya yig‘imini to‘laydi.
Eksport bozorlarida sotish uchun ishlab chiqarilgan avtomobillar mahalliy ishlab chiqaruvchi tomonidan ichki bozorga sotilgan taqdirda, ishlab chiqaruvchi hisobot oyidan keyingi oyning 10-sanasidan kechiktirmay utilizatsiya yig‘imini to‘laydi.
Utilizatsiya yig‘imi 100 foiz miqdorda daromadlar bo‘yicha g‘aznachilik shaxsiy hisobvarag‘iga tushadi.
Ma’lumot uchun, 2020-yil 1-avgustda O‘zbekistonda ayrim transport vositalariga utilizatsiya yig‘imi joriy etilgandi. Unga ko‘ra, transport vositalarini “erkin muomalaga chiqarish” (import) bojxona rejimida rasmiylashtiradigan jismoniy va yuridik shaxslar yoki O‘zbekiston hududida sotiladigan g‘ildirakli transport vositalari, o‘ziyurar mashinalar va ularning tirkamalarini ishlab chiqaradigan (yig‘adigan, tayyorlaydigan) jismoniy va yuridik shaxslar utilizatsiya yig‘imi to‘lovchilari hisoblanadi.
Shuningdek, O‘zbekistonda ayrim transport vositalaridan 2022-yil oxiriga qadar utilizatsiya yig‘imi undirilmasligi belgilangan.
Izoh (0)