Вазирлар Маҳкамаси қарори билан транспорт воситалари учун утилизация йиғимини ундириш, қайтариш ва ундан фойдаланиш тартиби тўғрисидаги низом тасдиқланди. Бу ҳақда Давлат солиқ қўмитаси хабар қилди.
Транспорт воситаларининг маҳаллий ишлаб чиқарувчиси ҳисобот ойидан кейинги ойнинг 20-санасидан кечиктирмай солиқ органига фақат Ўзбекистонда сотиш учун ишлаб чиқарилган транспорт воситалари бўйича утилизация йиғими ҳисоб-китобларини электрон шаклда тақдим этади ва сотилган транспорт воситалари бўйича утилизация йиғимини тўлайди.
Экспорт бозорларида сотиш учун ишлаб чиқарилган автомобиллар маҳаллий ишлаб чиқарувчи томонидан ички бозорга сотилган тақдирда, ишлаб чиқарувчи ҳисобот ойидан кейинги ойнинг 10-санасидан кечиктирмай утилизация йиғимини тўлайди.
Утилизация йиғими 100 фоиз миқдорда даромадлар бўйича ғазначилик шахсий ҳисобварағига тушади.
Маълумот учун, 2020 йил 1 августда Ўзбекистонда айрим транспорт воситаларига утилизация йиғими жорий этилганди. Унга кўра, транспорт воситаларини «эркин муомалага чиқариш» (импорт) божхона режимида расмийлаштирадиган жисмоний ва юридик шахслар ёки Ўзбекистон ҳудудида сотиладиган ғилдиракли транспорт воситалари, ўзиюрар машиналар ва уларнинг тиркамаларини ишлаб чиқарадиган (йиғадиган, тайёрлайдиган) жисмоний ва юридик шахслар утилизация йиғими тўловчилари ҳисобланади.
Шунингдек, Ўзбекистонда айрим транспорт воситаларидан 2022 йил охирига қадар утилизация йиғими ундирилмаслиги белгиланган.
Изоҳ (0)