Tojikiston Favqulodda vaziyatlar qo‘mitasi janubi-g‘arbiy mintaqalardan issiq va quruq ob-havo oqimi kirib kelishi tufayli mamlakatda 10-iyulgacha havo haroratining keskin ko‘tarilish kutilayotganini ma’lum qildi, deb yozadi Asia-Plus.
Xabarga ko‘ra, termometr ustuni mamlakat janubida 45—48 darajagacha, vodiylarda 39—44 darajagacha, tog‘li hududlarda esa 32 darajagacha ko‘tariladi.
Issiq havo tufayli respublikaning ayrim tog‘li hududlarda va g‘arbiy qismida muzliklar erib, toshqin paydo bo‘lishi xavfi mavjud. Ushbu davrda Panj, Vaxsh va Zeravshan daryolari havzalarida ham suv sathining ko‘tarilishi kutilmoqda.
Shu munosabat bilan, qo‘mita aholidan barcha ehtiyot choralarini ko‘rishni, toshqin yo‘li, zovurlar va ariqlardagi chiqindilarni tozalashni, tog‘larda shifobaxsh giyohlar terishdan, o‘tin yig‘ish, chorva mollarini boqish va ov qilishdan imkon boricha tiyilishni so‘radi.
Haydovchilar tog‘li hududlarda yoki yo‘llarning toshqin xavfi bo‘lgan qismlarida harakatlanayotganda, avtomobillar o‘rtasida belgilangan harakat oralig‘iga qat’iy rioya qilishi shart.
Bundan tashqari, Favqulodda vaziyatlar qo‘mitasi ushbu kunlarda xavfsizlik nuqta’yi nazaridan bir qator tavsiyalarga amal qilishni so‘radi. Xususan, quyoshning maksimal faolligi paytida — soat 11 dan 17 gacha zaruratsiz ko‘chaga chiqmaslik. Agar ko‘chaga chiqishga to‘g‘ri kelsa, unda tabiiy matolardan tikilgan keng bichimli hamda och rangli kiyimlar, yengil bosh kiyim kiyish tavsiya etiladi.
Shuningdek, tanani suvsizlanishdan himoya qilish uchun kuniga kamida 1,5—3 litr suyuqlik ichish kerak.
Spirtli ichimliklar, shu jumladan, pivoni, shuningdek, turli xil shirin gazlangan ichimliklarni iste’mol qilish tavsiya etilmaydi, ular nafaqat chanqoqni qondirmaydi, balki organizmdagi metabolik jarayonlarni sekinlashtiradi.
Bundan tashqari yengil ovqatlarni iste’mol qilish maqsadga muvofiqdir. Konditsionerli xonada havo haroratini 22—23 darajadan pastga tushirish tavsiya etilmaydi.
Favqulodda vaziyatlar qo‘mitasi issiq havoda bolalarga alohida e’tibor qaratish lozimligini aytdi. Shuningdek, daryolar, kanallar, hovuzlar va suv omborlari yaqinida dam olish va suzish chog‘ida xavfsizlik qoidalariga rioya qilishni so‘radi.
Izoh (0)