Дунёда коронавирусга учинчи марта чалиниш ҳолатлари қайд этилмоқда

Дунёда коронавирусга учинчи марта чалиниш ҳолатлари қайд этилмоқда ва ушбу ҳолда касаллик аввалгига қараганда оғирроқ кечиши мумкин. Бу ҳақда юқумли касалликлар бўйича россиялик мутахассис Евгений Тимаков айтиб ўтди.

«Вирус иммунитет тўсиқларини четлаб ўтиб, иккинчи ёки учинчи марта юқади. Кўпинча учинчи марта касалланиш биринчи ва иккинчисидан ҳам оғирроқ бўлади», — деди «Лидер-тиббиёт» тиббиёт маркази бош шифокори Тимаков Россиядаги эпидемиологик вазиятга бағишланган матбуот анжуманида.

Тимаков Россияда касалланишнинг учинчи тўлқини билан боғлиқ коронавирус «ҳиндча» (дельта) штаммининг ўзига хос хусусиятига ишора қилди.

Унинг сўзларига кўра, вирусни юқтиргандан кейин етти-саккиз кун ўтиб, касалхонага ётқизиш зарурати туғилса, беморнинг аҳволи ёмонлашиши мумкин.

Жаҳон соғлиқни сақлаш ташкилоти (ЖССТ) раҳбари Тедрос Гебрейесус коронавируснинг янги штаммлари вакциналар билан курашда ғолиб чиқаётганини айтди.

«Ҳозирда дори-дармонларни ишлаб чиқариш ва тарқатишдаги адолатсизлик сабабли янги вариантлар вакциналарга қарши курашда ғолиб чиқмоқда», — деди Гебрейесус.

Унинг таъкидлашича, бу глобал иқтисодиётни пандемия туфайли юзага келган инқироздан тиклашга халал бермоқда. ЖССТ раҳбарининг сўзларига кўра, кўплаб мамлакатларда касалланишнинг кескин ўсиши вакциналарни тақсимлашдаги тенгсизлик ва вируснинг доимий мутацияга учраши билан тўғридан-тўғри боғлиқ.

«Вакцина миллатчилиги, унинг асосий улуши бир нечта мамлакатларга тўғри келиши ахлоқий жиҳатдан номақбулдир ва вирусга қарши ижтимоий соғлиқни сақлаш стратегиясини самарасиз қилмоқда. Аҳолиси юқори даражада эмланган айрим мамлакатлар гўё пандемия тугагандек эпидемияга қарши чоралардан воз кечмоқда», — деди ташкилот раҳбари.

Гебрейесус дунёдаги миллионлаб соғлиқни сақлаш ходимлари ҳали ҳам эмланмаганидан «ғазабда эканини» айтди. «Ахлоқий, эпидемиологик ёки иқтисодий нуқтаи назардан, дунё ушбу пандемияга қарши биргаликда курашиш учун бирлашадиган вақт келди», — дея қўшимча қилди у.

Аввалроқ Гебрейесус коронавирусга қарши курашда эришилган ютуқларга қарамай, пандемия жуда хавфли босқичда эканини таъкидлаган. ЖССТ раҳбари ушбу вазиятдан чиқишнинг ягона йўли шахсий ҳимоя воситалари, тестлар, дорилар ва вакциналарни адолатли тақсимлаш эканини айтган.