Buxoroda to‘rtta maktabgacha ta’lim tashkiloti hamda Buxoro shahridagi Pedagogika kolleji karantinga yopildi. Bu haqda “Daryo”ga viloyat maktabgacha ta’lim boshqarmasi matbuot kotibi Bekzod Ne’matov xabar berdi.
Ta’kidlanishicha, 2021-yil 5-iyul holatiga ko‘ra, viloyatdagi to‘rtta davlat maktabgacha ta’lim tashkilotining 22 nafar hamda Buxoro shahridagi Pedagogika kollejining uch nafar xodimlarida koronavirus infeksiyasi aniqlangan. Mazkur ta’lim muassasalari 14 kunlik karantinga olingan.“Buxoro shahridagi 48-sonli, Buxoro tumanidagi 6, 45 hamda 51-sonli davlat maktabgacha ta’lim tashkilotlarida tarbiyalanayotgan bolalar salomatligi xavfsizligini ta’minlash maqsadida muassasa karantinga yopildi. Ayni paytda viloyatda 440 ta davlat maktabgacha ta’lim tashkiloti bo‘lib, bugungi kundagi epidemiologik holatni inobatga olgan holda karantin talablariga qat’iy rioya etish talab qilinmoqda”, — deydi Bekzod Ne’matov.
Izoh (0)