Ijtimoiy tarmoqlarda 2021-yilning 5-iyul kuni “Chortoq tumanida GAI, PPS va haydovchi o‘rtasida tortishuv yuzaga kelgani aytilmoqda” izohi bilan videolavha tarqaldi. Holat yuzasidan Namangan viloyati IIB rasmiy munosabat bildirdi.
Qayd etilishicha, 2021-yil 4-iyul kuni soat 16:30 larda Chortoq tuman IIB xodimlari tumandagi dehqon bozorida jamoat tartibini saqlash uchun jalb etilib, xizmat olib borayotgan vaqtlarida shu tumanda yashovchi, 1992-yilda tug‘ilgan fuqaro T.E. o‘ziga tegishli bo‘lgan Cobalt rusumli avtomashinasini to‘xtash mumkin bo‘lmagan joyga, ya’ni markaziy chorraha o‘rtasiga to‘xtatib, avtomashinalar harakatiga xalaqit bergan.
Shu hududda xizmat olib borayotgan, Chortoq tuman IIB YHXG katta inspektori tomonidan uning oldiga kelib ushbu harakatlari bilan Ma’muriy javobgarlik to‘g‘risidagi kodeksning 128-moddasi 6-qismini (transport vositalari haydovchilarining to‘xtash yoki to‘xtab turish qoidalarini buzishi) buzgani tushuntirilib, unga nisbatan ma’muriy bayonnoma tuzish aytilgan.
Shu vaqt fuqaro xodimning qonuniy talablarini bajarmay, avtomashinaga tegishli bo‘lgan hujjatlarni taqdim etmasdan, baqir-chaqir qilib, hududga fuqarolar to‘planishiga va hodisa ijtimoiy tarmoqda tarqalishiga sababchi bo‘lgan.
Ushbu holat yuzasidan Chortoq tuman IIB HPMB TP profilaktika inspektori tomonidan fuqaroga nisbatan Ma’muriy javobgarlik to‘g‘risidagi kodeksning 183, (mayda bezorilik) 194 (ichki ishlar organlari xodimining qonuniy talablarini bajarmaslik), 128-moddasi 6-qismi bilan ma’muriy bayonnoma rasmiylashtirilgan.
Bundan avval Toshkent shahrida YHXB inspektorlari tomonidan ta’qib qilingan voyaga yetmagan bola boshqaruvidagi Matiz Cobalt bilan to‘qnashgani, Parkentda IIB xodimlari fuqaroga kuch ishlatgani tasvirlangan video bo‘yicha ma’lumot berilgani hamda Gulistonda mast holda jamoat tartibini buzib, IIB xodimlariga qarshilik ko‘rsatgan shaxs 5 sutkaga qamalgani haqida xabar berilgandi.
Izoh (0)