O‘zbekistonda koronavirus bo‘yicha tashkil qilingan Call-markazlarga murojaatlar keskin ko‘paygan, deya xabar bermoqda Sog‘liqni saqlash vazirligi matbuot xizmati.
Sog‘liqni saqlash vazirligi tomonidan 2020-yilning 15-mart kuni 1003 yagona qisqa raqamli Call-markaz ishga tushirilgandi. Fuqarolar ushbu raqamga qo‘ng‘iroq qilib, koronavirus infeksiyasi bilan bog‘liq barcha savollarga mutaxassislardan aniq va asosli javob olmoqda.
Call-markaz hozirda ham faoliyat ko‘rsatmoqda. Kasallik avjiga chiqqan vaqtda unda 200 nafardan ortiq professor o‘qituvchilar, shifokorlar uch smenada uzluksiz fuqarolarning murojaatlariga javob bergan bo‘lsa, hozirda 30 nafar mutaxassis uch smenada qo‘ng‘iroqlarni qabul qilmoqda.
Qayd etilishicha, hozirda Call-markazga kuniga 1100–1200 ta murojaat kelib tushmoqda. Bu 20 kun avvalga qaraganda 3 barobar ko‘p.
“Aholidan kecha 1360 ta murojaat kelib tushgan. 20 kun avval kuniga 300–400 ta qo‘ng‘iroq bo‘lib turardi.
Karantin qoidalariga amal qilish kerak, niqob taqish kerak. Lekin fuqarolarimiz bunga juda ham sust qaramoqda” – deydi Call-markaz mutaxassisi Feruz Tojiyev.
Aksariyat murojaatchilar Toshkent shahri va viloyatlardagi COVID-19 bilan og‘rigan bemorlarni qabul qilayotgan shifoxonalarning manzili va telefon raqamini so‘ramoqda.
Avvalroq Zangiotadagi kasalxona bemorlar bilan to‘lgani, 2 ming kishiga mo‘ljallangan joyda 2,5 mingdan ortiq bemor davolanayotgani to‘g‘risida xabar berilgandi. Shuningdek, Toshkent shahrida DXX tasarrufidagi “Yoshlik” hamda IIV tasarrufidagi “Universal” sport majmualarida kovid-markaz qaytadan tashkil etilgan.Mamlakatda kunlik kasallanish holatlari soni yana ortib bormoqda. Shu sababli respublika bo‘ylab 28-iyundan karantin cheklovlari kuchaytirildi. Toshkent shahriga 28-iyundan transport vositalari kirishiga hamda ko‘ngilochar va ovqatlanish obyektlari faoliyatiga cheklovlar o‘rnatildi.
Izoh (0)