Toshkentga qaytayotgan Jaloliddinov, Dubayni tark etgan Masharipov, hal qiluvchi pallaga kirgan Yevro va Kopa Amerika. Sportga oid eng so‘nggi xabarlar dayjesti

Dunyo va o‘zbek sportiga oid so‘nggi kunlarning muhim xabarlari dayjesti bilan tanishing.

O‘zbekiston

Olimpiadaga yo‘l oladigan sportchilarni emlash jarayoni davom etmoqda. 2-iyul kuni bokschilarda vaksinatsiyaning ikkinchi bosqichi o‘tkazildi. O‘zbekiston boks delegatsiyasi tayyorgarlikning so‘nggi bosqichini musobaqa bo‘lib o‘tadigan joyda o‘tkazish uchun 4-iyul kuni Tokioga jo‘nab ketdi. Avvalroq Tokio—2020 Olimpiadasiga boradigan barcha o‘zbekistonlik sportchi, murabbiy va rasmiy vakillar vaksinatsiyadan o‘tkazilishi ma’lum qilingandi.

Superliganing 12-tur o‘yinlari 2—4-iyul kunlari bo‘lib o‘tdi. “Turon” o‘z maydonida “Metallurg”ni mag‘lub etgan holda, Superliga 2021-yilgi mavsumidagi ilk g‘alabasini qo‘lga kiritdi. Avvalroq yaypanliklar jamoasini tajribali mutaxassis Igor Shkvirin qabul qilib olgandi. Yana bir bahsda “Qizilqum” o‘z uyida “Mash’al”ni taslim etdi va muvaffaqiyatli seriyasini davom ettirdi. 3-iyul kuni esa “OKMK” jamoasi “Qo‘qon-1912”ni yengib, ikkinchi o‘ringa ko‘tarildi. “Andijon” so‘nggi soniyalardagi gol evaziga “Navbahor”dan ustun keldi. 4-iyul kuni turning so‘nggi uchta o‘yin bo‘lib o‘tdi. “Paxtakor” Toshkent derbisida “Lokomotiv”dan ustun keldi. “Bunyodkor” esa “Surxon”ni tor-mor keltirdi. Markaziy o‘yin Qarshida “Nasaf” va “So‘g‘diyona” o‘rtasida kechdi. Unda jizzaxliklar mavsumdagi ilk mag‘lubiyatni qabul qilib oldi.

Jasur Jaloliddinov “Andijon”dan ketdi. “Navbahor”ga qarshi o‘yindan keyin futbolchi o‘zning Instagram sahifasi orqali bu haqda ma’lum qildi. Jaloliddinov faoliyatini Toshkentning “Lokomotiv” klubida davom ettiradi. Bu haqda “temiryo‘lchilar” matbuot xizmati ma’lum qildi. 2020-yilda Rossiyada sarson bo‘lgan futbolchi 2021-yilning mart oyida “Andijon” futbolchisiga aylangandi.

Ibrohimxalil Yo‘ldoshevga “Jenoa”dan qiziqish bo‘lmoqda. Rossiyalik sharhlovchi va insayder Nobel Arustamyanga ko‘ra, genuyaliklar “Paxtakor”ning 20 yoshli himoyachisi transferini ushbu yozda amalga oshirmoqchi. Avvalroq unga Belgiyaning “Beersxot” klubidan qiziqish borligi xabar qilingandi.

Jaloliddin Masharipov “An-Nassr”ga qaytdi. O‘tgan mavsumni BAAning “Shabob al-Ahli” klubi ijara asosida o‘tkazgan o‘zbekistonlik futbolchi yana Saudiya Arabistoni klubiga qaytdi. Masharipov BAA chempionatida 12 ta o‘yin o‘tkazib, 2 ta gol va to‘rtta golli uzatma amalga oshirdi. Saudiyaliklar Masharipovni qishki transfer oynasida o‘z safiga qo‘shib olgan va legionerlar limiti sabab dubayliklarga ijaraga bergandi.

Jahon

Yevro—2020 chorak final o‘yinlari yakunlandi va yarim final juftliklar ma’lum bo‘ldi.Italiya terma jamoasi saralash bahslarini hisobga olganda Yevropa chempionatidagi ketma-ket 15-g‘alabani qo‘lga kiritdi. Bu musobaqa rekordi hisoblanadi. Belgiyaning 14 o‘yinlik g‘alabali seriyasiga esa yakun yasaldi. Roberto Manchisi jamoasi ketma-ket 32 ta o‘yindan buyon yutqazmayapti va bu borada shaxsiy rekordini yaxshilab oldi.

Yevro—2020 kashfiyoti uzoq muddatga safdan chiqdi. Italiya terma jamoasi chap qanot himoyachisi Leonardo Spinatssola Belgiyaga qarshi o‘yinning 79-daqiqasida og‘ir jarohat oldi va ko‘z yosh to‘kib, maydonni tark etdi. Qayd etilishicha, uning tovon paylarida yorilish yuzaga kelgan. Bu jarohat sabab himoyachi bir yilgacha bo‘lgan muddatga safdan chiqishi mumkin. Spinatssola Yervopa chempionatida ikki bor uchrashuvning eng yaxshi o‘yinchisi deb topilgandi.

Angliya terma jamoasi o‘z tarixida ilk bor ketma-ket yettita o‘yinda o‘z darvozasidan to‘p o‘tkazmadi. Inglizlarning quruq seriyasi 662 daqiqadan beri davom etmoqda. “Uch sherlar” 1996-yildan keyin ilk bor Yevropa chempionati yarim finalida o‘ynaydi.

Shvetsiya hujumchisi Patrik Shik Yevro—2020 dagi gollari sonini 5 taga yetkazdi va eng yaxshi to‘purar Krishtianu Ronalduga yetib oldi. Shuningdek, Shik Chexiya safida bitta yirik musobaqada doirasida gol urish bo‘yicha Milan Baroshning rekordini takrorladi. Barosh Yevro–2004 da beshta gol urgan va musobaqa to‘purari bo‘lgandi.

Daniya 1992-yildan beri ilk bor Yevro yarim finaliga chiqdi. O‘shanda daniyaliklar musobaqa g‘olibiga aylangandi. Shuningdek, Daniya Yevroning dastlabki ikki o‘yinida mag‘lub bo‘lib, yakunda yarim finalga qadar yetib kelgan birinchi jamoaga aylandi.

Kopa Amerika—2021 da ham chorak final bahslari yakunlandi. Unga ko‘ra Braziliya, Peru, Argentina va Kolumbiya yarim final yo‘llanmasiga ega bo‘ldi.

Toni Kroos faoliyatini qachon va qayerda yakunlamoqchi ekanini aytdi

O‘ylashimcha, 2023-yil mos keladigan palla, men 33 yoshda bo‘laman. Hali “Real” bilan shartnomani yana bir yoki ikki yilga uzaytirish borasida qaror qabul qilishimga to‘g‘ri keladi. Biroq bir narsaga mutlaqo ishonchim komil, faoliyatimni “Real”da yakunlayman.

Germaniyadagi barchani ayblamoqchi emasman, chunki ko‘plab muxlislar o‘yinimga yaxshi baho berdi. Biroq ayrim hollarda 11 yillik mehnatimdan keyin ham odamlar menga yetarli baho bermayotgandek tuyuladi. Ispaniyada esa hammasi boshqacha. Yetti yil avvalgi birinchi o‘yinimdan hozirgacha odamlar mendan minnatdor.

Toni Kroos, “Real” futbolchisi

Transfer yangiliklari

“Manchester Yunayted” “Real” himoyachisi Rafael Varanni qo‘lga kiritmoqchi. Ingliz klubi Varan transferi uchun 45 million yevrodan ortiq mablaf sarflash niyatida emas. Madridliklar esa futbolchi uchun 70 million so‘ramoqda. “Manchester Yunayted” kelishuvga yarim himoyachi Pol Pogbani qo‘shishga tayyor. Har ikki futbolchining amaldagi shartnomasi 2022-yil yozida yakunlanadi. ABC nashrining xabariga ko‘ra, Varan “Man Yunayted”da yiliga 12 million yevro maosh oladi. “Real” esa yangi shartnomada unga 7 million taklif qilgan.

Avvalroq “Yunayted” Jeydon Sancho transferini hal qilgan ma’lum bo‘lgandi. Shuningdek, jamoa yarim himoyaga nomdor futbolchi olib kelish niyatida.

“PSJ” Lionel Messiga “Barselona”dan foydaliroq taklif bilan chiqdi, deya xabar qilmoqda AS. Hozirda futbolchining e’tibori Amerika Kubogiga qaratilgan. Musobaqa tugagandan keyin parijliklar muzokaralarga kirishmoqchi. Eslatib o‘tamiz, Messi 1-iyuldan e’tiboran erkin agent maqomini olgan.

Hozirda katalonlar Messi bilan yangi kelishuv borasida muzokaralar olib bormoqda. Leoning shartlarini qanoatlantirish uchun jamoa maoshlar masalasini ko‘rib chiqishi va bir nechta futbolchisidan voz kechishiga to‘g‘ri keladi. Aks holda moliyaviy feyr-pley bilan bog‘liq muammolar paydo bo‘lishi mumkin. Xabarlarga ko‘ra, “Barselona” Umtiti va Pyanichga shartnomani bekor qilishni taklif qilgan. Biroq ikki futbolchi ham bu taklifni rad etgan.