Buxoro viloyat Sanitariya-epidemiologiya xizmati rahbari lavozimida ishlab, 2020-yilning noyabr oyida karantin qoidalariga rioya qilmagan to‘yxona egasidan pora olgan Qambar Rasulov sud hukmi bilan uch yil muddatga qamaldi. Bu haqda “Daryo”ga Jinoyat ishlari bo‘yicha Vobkent tuman sudi raisi Akram Rahimov ma’lum qildi.
Ta’kidlanishicha, Qambar Rasulov mansabdor davozimda ishlab turgan bo‘lsa-da, muqaddam — 2011-yilda Jinoyat kodeksining bir qator moddalari bilan ayblangan. Amnistiya qarori bilan jazodan ozod qilinganiga qaramay, u 2020-yilda yana jinoyat sodir etgan.2020-yilning 4-noyabr kuni “Daryo”da “Buxoroda viloyat Sanitariya-epidemiologiya xizmati rahbari o‘tkazgan to‘yda kamida 60 kishi qatnashdi. Rahbar buni ‘o‘zbekchilik’ deya izlohladi” sarlavhali jurnalistik surishtiruv e’lon qilingan edi. “Daryo” surishtiruviga ko‘ra, viloyat Davlat sanitariya-epidemiologiya nazorati markazi rahbari Qambar Rasulov Buxoro shahrida joylashgan “Ipak yo‘li”to‘yxonasidagi holatdan bexabarligini, viloyatdagi to‘yxonalarga 30 nafardan oshmagan kishi bilan to‘y o‘tkazishga ruxsat berilgani bo‘yicha tavsiya xati “Ipak yo‘li”ga yetkazilmay qolganini ma’lum qilgandi. Va, shuningdek, Rasulov 30 nafardan ortiq kishilar bilan qilingan to‘ylardan jarima undirilishini bildirgandi.
“Daryo” surishtiruvidan besh kun o‘tib, ya’ni 2020-yilning 9-noyabr kuni Qambar Rasulov karantin qoidalariga rioya qilmagan to‘yxona egasidan pora olayotganda qo‘lga olindi.
Sud hujjatlari orqali aniqlanishicha, viloyat Davlat sanitariya-epidemiologiya nazorati boshqarmasi boshlig‘i lavozimida ishlab kelgan Qambar Rasulov Buxoro shahridagi “Jamila Jahoni Lazzat Omad” MChJ ish yurituvchisi Q.Mansurovdan karantin qoidalariga rioya qilmagani holati yuzasidan unga ma’muriy jarima jazosi qo‘llamaslik evaziga 600 dollar talab qilgan. U 2020-yilning 7-noyabr kuni fuqaro Q.Mansurovdan kimyoviy ishlov berilgan 400 dollar va 500 ming so‘m pulni xizmat xonasida pora tariqasida olgan vaqtida huquqni muhofaza qiluvchi organ xodimlari tomonidan qo‘lga olingan.
Sud majlisida sudlanuvchi tariqasida so‘roq qilingan Qambar Rasulov avvaliga o‘z xatti-harakatlariga umuman iqrorlik bildirmagan. Sud-tergov jarayonida esa uning karantin qoidalariga rioya qilmagan “Jamila Jahoni Lazzat Omad” MChJ rahbariga nisbatan bazaviy hisoblash miqdorining 50 baravari, ya’ni 11 million 150 ming so‘m jarima tayinlanishi mumkinligini aytgani, IIB tomonidan tuzilgan hujjatlar bo‘yicha jarima tayinlamasdan, mazkur hujjatlarni IIBga qaytarib yuborishi mumkinligini va bu yirik miqdordagi jarimani 600 dollar bilan “bosti-bosti”qilib yuborishini bildirgani ma’lum bo‘lgan.
Sud majlisida guvoh tariqasida so‘roq qilingan bir nechta shaxslar, to‘plangan hujjatlar hamda audioyozuvdagi so‘zlashuvlar isbotlangach, Q.Rasulov o‘z aybiga iqrorlik bildirgan. U sud-tergov jarayonlarini chalg‘itishga uringanini tan olib, qilmishidan pushaymon ekanini, shuningdek, qaramog‘ida uch nafar farzandi borligini inobatga olib, qonuniy yengillik berishni so‘ragan.
Sud hukmiga ko‘ra, Q.Rasulov Jinoyat kodeksining 210-moddasi 1-qismi (pora olish) bilan aybli deb topilgan va u uch yil muddatga mansabdorlik va moddiy javobgarlik lavozimlarida ishlash huquqidan mahrum qilinib, uch yil muddatga ozodlikdan mahrum qilingan.
Izoh (0)