Toshkent shahar hokimligi poytaxtdagi “Universal” sport majmuasida 700 koyka-o‘ringa mo‘ljallangan kovid-markaz ishga tushgani tasvirlangan video bilan bo‘lishdi.
Videodan ko‘rish mumkinki, Toshkent hokimi Jahongir Ortiqxo‘jayev ushbu markazga borib, yaratilgan sharoitlar bilan tanishgan. Unga hamrohlik qilgan Ichki ishlar vazirligi mas’ullarining so‘zlariga ko‘ra, mazkur kovid-markaz 700 koyka-o‘ringa mo‘ljallangan bo‘lib, uning 50 tasi o‘ta og‘ir darajadagi bemorlar uchun reanimatsiya bo‘limi vazifasini bajaradi.
Ta’kidlanishicha, markazda barcha narsa shay holatga keltirilgan va bemorlarni kutib olish uchun shifokorlar guruhi jalb qilingan.
Shuningdek, Toshkent hokimi 5-iyuldan “O‘zekspomarkaz” ko‘rgazma majmuasi bazasida 700 o‘rinlik taqsimlash markazining ishini qayta yo‘lga qo‘yish bo‘yicha topshiriq bergan.
Avvalroq Toshkent shahrida DXX tasarrufidagi “Yoshlik” sport majmuasida kovid-markaz qaytadan tashkil etilgani to‘g‘risida xabar berilgandi.
Eslatib o‘tamiz, 2020-yil noyabr oyining oxirlarida “Atlas” va “Yoshlik” koronavirusga ixtisoslashgan markazlari, 2020-yil 9-dekabr kuni esa “O‘zekspomarkaz”dagi kovid-markaz yopilgandi. O‘shanda kasallik dinamikasi oshganda yopilgan obyektlar tezkor ravishda qayta ochilishi ma’lum qilingandi.
Mamlakatda kunlik kasallanish holatlari soni yana ortib bormoqda. Shu sababli respublika bo‘ylab 28-iyundan karantin cheklovlari kuchaytirildi. Toshkent shahriga 28-iyundan transport vositalari kirishiga hamda ko‘ngilochar va ovqatlanish obyektlari faoliyatiga cheklovlar o‘rnatildi.
Izoh (0)