Ma’lumki, O‘zbekistonda 2021-yil “Yoshlarni qo‘llab-quvvatlash va aholi salomatligini mustahkamlash yili” deb nomlanib, Prezident Shavkat Mirziyoyev tashubbusi bilan bu borada davlat dasturi qabul qilindi.
2021-yilning 29-iyun kuni Prezident Shavkat Mirziyoyev yoshlar bilan yana bir bor uchrashib, “Men har gal yoshlarimiz bilan uchrashganimda, sizlarning g‘ayrat-shijoatingizdan kuch-quvvat olaman, ko‘nglim tog‘day ko‘tariladi”, — degan edi. Davlat rahbari tomonidan yoshlarga doir davlat siyosatini samarali amalga oshirish maqsadida, ularning ijtimoiy muammolarini tizimli asosda o‘rganish, bu boradagi ishlarni muvofiqlashtirish bo‘yicha topshiriqlar belgilab berilgan edi.
Yoshlarga oid davlat siyosatini amalga oshirishga qaratilgan chora-tadbirlar va berilgan topshiriqlar ijrosini ta’minlash maqsadida, “O‘zbekneftgaz” AJ boshqaruvi raisi Mehriddin Abdullayev va Qashqadaryo viloyati hokimi Zoir Mirzayev Kitob tumanida yoshlar bilan uchrashishdi. Ta’kidlash kerakki, ushbu uchrashuvda kutilganidan ko‘ra ko‘proq yoshlar qatnashdi va ular turli mavzularda o‘zini qiziqtirgan savollar bilan murojaat qilishdi.
Uchrashuvdan avval yoshlarning axborot texnologiyalari, sport, madaniyat va hunarmandchilik sohalarida qilgan ishlari, kitobxonlik hamda texnika yo‘nalishlarida erishgan yutuqlari bilan yaqindan tanishib chiqildi. Ularning har biri bilan alohida suhbat o‘tkazilib, kitobxon yigitning keyingi faoliyatida uni qo‘llab-quvvatlash uchun barcha sharoitlar yaratib berilishi aytildi.
Yosh bo‘lishiga qaramay, axborot texnologiyalari yo‘nalishida muvaffaqiyatga erishgan hamda o‘zi tahsil olgan maktabining internet saytini yaratgan o‘quvchiga “O‘zbekneftgaz” AJ boshqaruvi raisi tomonidan noutbuk sovg‘a qilindi.
Ta’kidlash kerakki, ushbu kunda ochiq muloqot katta fistevalga aylanib ketdi. Rassom, kashtachi, hunarmand va sportchilar alohida bahslashishdi. Kurash bo‘yicha bellashuv g‘oliblariga esdalik sovg‘alari topshirildi.
Shundan so‘ng, ikki rahbar va yoshlarning o‘rtasida ochiq muloqot boshlandi. Uchrashuvda so‘z olgan Qashqadaryo viloyat hokimi davlat rahbari tomonidan yoshlarga berilayotgan e’tibor, ularga yaratilayotgan sharoit hamda imkoniyatlar haqida so‘zlab, neft va gaz sohasida bajarilayotgan ishlarga ham alohida to‘xtalib o‘tdi.
Bu borada viloyat hokimligi ham ushbu sohani rivojlanishi uchun bor imkoniyat bilan yordam berishga tayyor ekanligini ma’lum qildi. “O‘zbekneftgaz” AJ boshqaruvi raisi neft va gaz sohasi rivojlanishi yo‘lida Qashqadaryo viloyati aholisining mehnati alohida o‘rin tutishi, Qashqadaryo viloyati bu sohaning “yuragi” ekanligini bildirdi.
Qashqadaryo viloyatining vatanparvar, mehnatkash va tanti insonlari sababli bugun bu sohada rivojlanishda davom etayotganini e’tirof etdi. Yoshlar o‘zini qiziqtirgan barcha savollarga javob olishdan tashqari, o‘z takliflarini ham bildirishdi.
Sportchi yoshlar yanada yaxshi natijalarga erishish uchun qo‘shimcha sport anjomlari lozimligini, boshqaruv raisi va viloyat hokimi ushbu masalada ko‘maklashishsa, g‘oliblar ko‘payishiga va’da berishini aytib o‘tishdi. Ayrim yoshlar neft va gaz sohasiga qiziqishini, bu yo‘nalishda ishlashni xohlashini, ishga kirish uchun yordam berilishini so‘rashdi.
Uchrashuvda “O‘zbekneftgaz” AJ boshqaruvi raisi va Qashqadaryo viloyati hokimi tomonidan savollar berildi hamda g‘oliblar mukofotlandi.
Zoir Mirzayev Amir Temur bobomizning o‘ta sir saqlagan quroli nima ekanligi hamda shoir Abdulla Oripovning “Tilla baliqcha” she’rini yoddan aytib berilishi bo‘yicha savol berdi. Mehriddin Abdullayev esa O‘zbekistonda birinchi neft koni qachon va qayerda ochilgani bo‘yicha savol bilan murojaat qildi.
O‘ta qiziqarli ruhda o‘tgan uchrashuvda yoshlar o‘zi uchun motivatsiya olishganini, bu uchrashuv yana tashkillashtirilsa ularning xursandchiligi ortishini takrorlab, har ikkalaga rahbarga minnatdorchilik bildirishdi.
“Yoshlar daftari”ga kiritilgan, ijtimoiy himoyaga muhtoj va kam ta’minlangan oila farzandlariga tikuv mashinalari hamda boshqa turdagi sovg‘alar berildi. Uchrashuv yakunlanayotgan bo‘lsada, bu so‘nggisi emasligi aytilib, rahbarlar barcha yoshlarni ham ma’nan, ham ruhan doimo qo‘llab-quvvatlashga tayyor ekanligini bildirishdi.
Shuningdek, yoshlarning axborot texnologiyalari, sport sohalariga bo‘lgan qiziqishlarini qo‘llab-quvvatlash maqsadida, Qashqadaryo viloyati hokimi va “O‘zbekneftgaz” AJ boshqaruvi raisi tomonidan kompyuter jamlanmalari, televizor va sport anjomlari topshirildi.
“O‘zbekneftgaz” AJ matbuot xizmati
Izoh (0)