Samarqand viloyati Narpay tumanida mastlikda begona qizga shilqimlik qilgan erkak javobgarlikka tortildi. Bu haqda viloyati IIB axborot xizmati xabar berdi.

Foto: Samarqand viloyati IIB axborot xizmati

Ma’lum qilinishicha, 19-iyun kuni tumandagi “Mirbozor” bozorida fuqaro S.D. mast holatda notanish U.U. ismli qizning qo‘lidan tortib, unga nisbatan shilqimlik qilgan. U.U. esa Narpay tumani IIBga ariza bilan murojaat qilib, ushbu erkakka nisbatan qonuniy chora ko‘rilishini so‘ragan.

Jinoyat ishlari bo‘yicha Narpay tuman sudining 23-iyundagi qaroriga asosan, S.D. Ma’muriy javobgarlik to‘g‘risidagi kodeksning 183-moddasi (mayda bezorilik) bilan aybdor deb topilib, unga nisbatan 15 sutka ma’muriy qamoq jazosi tayinlangan.

Shundan so‘ng, S.D.ning yaqinlari tuman IIBga borib, noroziliklarini bildirgan. Holat S.D.ning yaqinlariga tushuntirib berilganidan so‘ng, fuqarolar uylariga ketgan.

Avvalroq Namanganda qiz bolaga shilqimlik qilgan yigitlardan birini yog‘och bita bilan urgan erkakka jinoyat ishi ochilgani to‘g‘risida xabar berilgandi.