Бухоро вилоят Санитария-эпидемиология хизмати раҳбари лавозимида ишлаб, 2020 йилнинг ноябрь ойида карантин қоидаларига риоя қилмаган тўйхона эгасидан пора олган Қамбар Расулов суд ҳукми билан уч йил муддатга қамалди. Бу ҳақда «Дарё»га Жиноят ишлари бўйича Вобкент туман суди раиси Акрам Раҳимов маълум қилди.
Таъкидланишича, Қамбар Расулов мансабдор давозимда ишлаб турган бўлса-да, муқаддам — 2011 йилда Жиноят кодексининг бир қатор моддалари билан айбланган. Амнистия қарори билан жазодан озод қилинганига қарамай, у 2020 йилда яна жиноят содир этган.2020 йилнинг 4 ноябрь куни «Дарё»да «Бухорода вилоят Санитария-эпидемиология хизмати раҳбари ўтказган тўйда камида 60 киши қатнашди. Раҳбар буни ‘ўзбекчилик’ дея излоҳлади» сарлавҳали журналистик суриштирув эълон қилинган эди. «Дарё» суриштирувига кўра, вилоят Давлат санитария-эпидемиология назорати маркази раҳбари Қамбар Расулов Бухоро шаҳрида жойлашган «Ипак йўли»тўйхонасидаги ҳолатдан бехабарлигини, вилоятдаги тўйхоналарга 30 нафардан ошмаган киши билан тўй ўтказишга рухсат берилгани бўйича тавсия хати «Ипак йўли»га етказилмай қолганини маълум қилганди. Ва, шунингдек, Расулов 30 нафардан ортиқ кишилар билан қилинган тўйлардан жарима ундирилишини билдирганди.
«Дарё» суриштирувидан беш кун ўтиб, яъни 2020 йилнинг 9 ноябрь куни Қамбар Расулов карантин қоидаларига риоя қилмаган тўйхона эгасидан пора олаётганда қўлга олинди.
Суд ҳужжатлари орқали аниқланишича, вилоят Давлат санитария-эпидемиология назорати бошқармаси бошлиғи лавозимида ишлаб келган Қамбар Расулов Бухоро шаҳридаги «Жамила Жаҳони Лаззат Омад» МЧЖ иш юритувчиси Қ.Мансуровдан карантин қоидаларига риоя қилмагани ҳолати юзасидан унга маъмурий жарима жазоси қўлламаслик эвазига 600 доллар талаб қилган. У 2020 йилнинг 7 ноябрь куни фуқаро Қ.Мансуровдан кимёвий ишлов берилган 400 доллар ва 500 минг сўм пулни хизмат хонасида пора тариқасида олган вақтида ҳуқуқни муҳофаза қилувчи орган ходимлари томонидан қўлга олинган.
Суд мажлисида судланувчи тариқасида сўроқ қилинган Қамбар Расулов аввалига ўз хатти-ҳаракатларига умуман иқрорлик билдирмаган. Суд-тергов жараёнида эса унинг карантин қоидаларига риоя қилмаган «Жамила Жаҳони Лаззат Омад» МЧЖ раҳбарига нисбатан базавий ҳисоблаш миқдорининг 50 баравари, яъни 11 миллион 150 минг сўм жарима тайинланиши мумкинлигини айтгани, ИИБ томонидан тузилган ҳужжатлар бўйича жарима тайинламасдан, мазкур ҳужжатларни ИИБга қайтариб юбориши мумкинлигини ва бу йирик миқдордаги жаримани 600 доллар билан «бости-бости»қилиб юборишини билдиргани маълум бўлган.
Суд мажлисида гувоҳ тариқасида сўроқ қилинган бир нечта шахслар, тўпланган ҳужжатлар ҳамда аудиоёзувдаги сўзлашувлар исботлангач, Қ.Расулов ўз айбига иқрорлик билдирган. У суд-тергов жараёнларини чалғитишга уринганини тан олиб, қилмишидан пушаймон эканини, шунингдек, қарамоғида уч нафар фарзанди борлигини инобатга олиб, қонуний енгиллик беришни сўраган.
Суд ҳукмига кўра, Қ.Расулов Жиноят кодексининг 210-моддаси 1-қисми (пора олиш) билан айбли деб топилган ва у уч йил муддатга мансабдорлик ва моддий жавобгарлик лавозимларида ишлаш ҳуқуқидан маҳрум қилиниб, уч йил муддатга озодликдан маҳрум қилинган.
Изоҳ (0)