Dunyo va o‘zbek sportiga oid 2-iyul tongining muhim xabarlari dayjesti bilan tanishing.
O‘zbekiston
O‘zbekiston terma jamoasi va BAAning “Sharja” klubi yarim himoyachisi Otabek Shukurov “Mard o‘g‘lon” davlat mukofotiga sazovor bo‘ldi. Bu haqda Prezident Shavkat Mirziyoyev 30-iyun, chorshanba kuni Botanika bog‘ida o‘tkazilgan O‘zbekiston yoshlar va talabalar forumida ma’lum qildi. Futbolchi o‘z hisobidan 12 milliard so‘m sarflab, bolalar bog‘chasi va o‘quv markazi barpo qilgan.
Professional futbol ligasi (PFL) iyun oyi yakunlari bo‘yicha Superliganing eng yaxshilari nomini e’lon qildi. Oyning eng yaxshi o‘yinchisi nomiga “Nasaf” hujumchisi Husayn Norchayev loyiq ko‘rildi. Eng yaxshi murabbiy sifatida Ro‘ziqul Berdiyev (“Nasaf”) e’tirof etildi. “Andijon” futbolchisi Doniyor Abdumannopovning “OKMK” darvozasiga kiritgan to‘pi oyning eng chiroyli goli deb topildi.
Jahon
2-iyul kuni Yevro—2020 musobaqasining chorak final uchrashuvlari start oladi. Juma kuni muxlislarni Shveysariya — Ispaniya (21:00) va Belgiya — Italiya (00:00) uchrashuvlari kutib turibdi.
UEFA Yevropa Superligasi asoschi klublarini o‘z musobaqalaridan chiqarib yuborish huquqiga ega emas, deya qaror chiqardi Madrid sudi. Sudda agar UEFA bu qarorga rioya qilmasa, unga nisbatan tergov ishi qo‘zg‘atilishi aytildi. Shuningdek, sud UEFAdan “Real”, “Yuventus” va “Barselona” klublariga nisbatan qo‘llanilgan sanksiyalarni bekor qilishni so‘radi. Avvalroq tashkilot klublarga jazo sifatida Yevrokubokdagi daromadining 5 foizidan voz kechishni va 15 million yevro miqdorida xayriya qilishni belgilab qo‘ygandi.
Aprel oyida Yevropaning 12 klubi yangi musobaqaga asos solinganini e’lon qilgandi. Biroq bu loyiha ikki kun yashadi. Avvaliga APL grandlari, keyin esa boshqa klublar loyihani tark etishini e’lon qildi. Hozirda faqat yuqoridagi uch klub Superliga a’zoligidan chiqmagan.
Eng boy MMA vakillari reytingi tuzildi. South China Morning Post nashri MMA tarixidagi eng boy shaxslar ro‘yxatini tuzdi. Unga ko‘ra, birinchi o‘rinda Konor Makgregor qayd etilgan. Irlandiyalik sportchining boyligi 400 million dollarga baholangan. UFC yengil vazn toifasining sobiq chempioni Habib Nurmagomedov esa (40 mln dollar) ikkinchi o‘rinda qayd etilgan. Kuchli beshlikdan Jorj Sen-Pyer (30 mln dollar), Brok Lesnar (25 mln dollar) va Bi Jey Penn (22 mln dollar) joy olgan.
Krishtianu Ronalduning Instagram sahifasidagi bitta reklama narxi 1,6 million dollarga teng, deya xabar qilmoqda BBC. Bu Instagram’dagi shaxslar ichida eng yuqori ko‘rsatkich hisoblanadi. Ronaldu birinchi marta bu borada yetakchiga aylandi. Undan keyingi o‘rinlarda aktyor Dueyn Jonson (1,52 mln dollar) va qo‘shiqchi Arina Grande (1,51 mln dollar) bormoqda. Messi (1,1 mln dollar) bu borada yettinchi o‘rinda bo‘lsa, Neymar (824 ming dollar) 16-pog‘onadan joy olgan. Avvalroq Ronaldu Instagram’da 300 million obunachiga ega ilk shaxsga aylangandi.
Transfer yangiliklari
Serxio Ramos “PSJ” bilan 2023-yilning yoziga qadar mo‘ljallangan shartnoma imzolaydi. Yaqin orada ispaniyalik futbolchi tibbiy ko‘rikdan o‘tadi, deya xabar qilmoqda Fabrisio Romano. Xabarlarga ko‘ra, Ramos “PSJ”ga o‘tish uchun APL klublaridan tushgan foydaliroq takliflarni rad etgan. Futbolchi 2020/21-mavsum yakunida “Real”ni erkin agent sifatida tark etgandi.
Kilian Mbappe Yevro—2020 dan keyin ta’tilga yo‘l oldi. Gap shundaki, “PSJ” futbolchiga katta maoshga ega shartnoma taklif qilgan va bu masalani muhokama qilish uchun futbolchini muzokaralarga chaqirgan. Biroq Kilian 2022-yil yozida tugaydigan kelishuvni uzaytirmasligini Parij klubi rahbarlariga ma’lum qilgan. Qayd etilishicha, “PSJ”ning taklif qilgan yangi shartnomasi nafaqat, Kilian uchun, balki uning oila a’zolari uchun ham moliyaviy tomondan foydali. Avvalroq “PSJ” Kilianning 15 yoshli ukasi Itan Mbappe bilan shartnoma imzolagandi.
Jeydon Sanchoning “Manchester Yunayted”ga o‘tishi rasman tasdiqlandi. “Borussiya D” futbolchi 85 million yevro evaziga ingliz klubi safiga o‘tayotganini ma’lum qildi. Eslatib o‘tamiz, dortmundliklar o‘tgan yozda “Manchester Yunayted”ning Sancho borasida 100 million yevrolik taklifiga rad javobini bergandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)