Dunyo va o‘zbek sportiga oid 30-iyun tongining muhim xabarlari dayjesti bilan tanishing.
O‘zbekiston
Professional futbol Ligasi Superliga 12-tur uchrashuvlarining boshlanish vaqtlarini ma’lum qildi. 2—4-iyul kunlari musobaqaning navbatdagi tur o‘yinlar bo‘lib o‘tadi.O‘yinlar ro‘yxati bilan tanishing:
Jahon
Yevro—2020 1/8 finalidan o‘rin olgan barcha o‘yinlar yakunlandi va chorak final juftliklari ma’lum bo‘ldi:Yevro—2020
Chorak final bahslari
2-iyul, juma
Shveysariya — Ispaniya 21:00
Belgiya — Italiya 00:00
3-iyul, shanba
Chexiya — Daniya 21:00
Ukraina — Angliya 00:00
Angliya 1/8 finalda Germaniyadan ustun keldi. Shu tariqa “o‘lim guruhi” deb atalgan F guruhining barcha vakillari (Fransiya, Portugaliya, Germaniya, Vengriya) musobaqani tark etdi. Angliya Yevro tarixida ikkinchi marta pley-off bahsini asosiy vaqtdagi g‘alaba bilan yakunladi. Garet Sautgeyt shogirdlari Yevro—2020 dagi dastlabki to‘rtta o‘yinda gol o‘tkazmadi. Angliya JCh—1966 ni shunday boshlagan va yakunda musobaqa g‘olibiga aylangandi.
Yoaxim Lyov Germaniya terma jamoasi boshqaruvidagi so‘nggi o‘yinini o‘tkazdi. Mutaxassis JCh—2014 dagi chempionlikdan keyin biror marta yirik musobaqa finaliga chiqa olmadi. Germaniyaning keyingi murabbiyi “Bavariya” sobiq ustozi Hans Diter Flik bo‘ladi.
Shvetsiyani musobaqadan chiqarib yuborgan Ukraina ilk bor Yevropa chempionati chorak finaliga yo‘l oldi. Bir vaqtlar JCh—2006 chorak finaliga qadar yetib borgan Ukrainaning sardori bo‘lgan Andrey Shevchenko bu safar murabbiy sifatida jamoasini ¼ finalga olib chiqdi.
Yevro—2020 dagi qoniqarsiz natijadan keyin Niderlandiya terma jamoasi bosh murabbiyi Frank de Bur iste’foga chiqarildi. 51 yoshli mutaxassis 2020-yilning sentabrida terma jamoani qabul qilib olgandi.
Fransiya ustozi Didye Desham esa Shveysariyaga qarshi o‘yindagi sensatsion mag‘lubiyatdan keyin ham o‘z lavozimida qoladi, deya xabar qilmoqda ESPN. Kelasi hafta mutaxassis Fransiya futbol federatsiya prezidenti bilan uchrashadi. O‘shanda uning taqdiri hal bo‘lishi kutilmoqda.
Transfer yangiliklari
“Roma” himoyachisi Leonardo Spinatssola bir qator grand klublar qiziqishlariga sabab bo‘lmoqda. Janluka di Martsioga ko‘ra, futbolchi borasida “Real”, “Barselona” va “PSJ” kabi klublardan so‘rov yuborilgan. Italiya terma jamoasi vakili Yevro—2020 da ikki bor uchrashuvning eng yaxshi o‘yinchisi nomiga loyiq ko‘rildi.
“Barselona” transfer oynasida faollikni davom ettirmoqda. Jamoa yarim himoyachisi Konrad de la Fuente “Lion”ga sotib yuborildi. Xabarlarga ko‘ra, fransuz klubi futbolchi transferi uchun 3,5 million yevro to‘lagan. Shuningdek, katalonlar 2020-yilning yozida 7 million yevro evaziga sotib olingan Mateus Fernandes bilan shartnomani bekor qildi. Futbolchi 2020/21-yilgi mavsumda asosiy jamoada bor-yo‘g‘i 17 daqiqada harakat qilgandi.
“Manchester Yunayted” Jeydon Sancho transferini shu hafta hal qiladi, deya xabar qilmoqda The Telegraph. Ingliz klubi transfer uchun 90 million yevrodan ko‘proq pul sarflaydi. 21 yoshli futbolchi Angliya Yevro—2020 dagi ishtirokini yakunlagandan keyin Manchester klubi uchun tibbiy ko‘rikdan o‘tadi. “Manchester Siti” ushbu transfer summasidan 15% ulushga ega bo‘ladi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)