Кейинги манзили аниқ бўлган Серхио Рамос, судланган УЕФА ва қайсар Мбаппе. Энг сўнгги спорт янгиликлари

Дунё ва ўзбек спортига оид 2 июль тонгининг муҳим хабарлари дайжести билан танишинг.

Ўзбекистон

Профессионал футбол лигаси (ПФЛ) июнь ойи якунлари бўйича Суперлиганинг энг яхшилари номини эълон қилди. Ойнинг энг яхши ўйинчиси номига «Насаф» ҳужумчиси Ҳусайн Норчаев лойиқ кўрилди. Энг яхши мураббий сифатида Рўзиқул Бердиев («Насаф») эътироф этилди. «Андижон» футболчиси Дониёр Абдуманноповнинг «ОКМК» дарвозасига киритган тўпи ойнинг энг чиройли голи деб топилди.

Жаҳон

УЕФА Европа Суперлигаси асосчи клубларини ўз мусобақаларидан чиқариб юбориш ҳуқуқига эга эмас, дея қарор чиқарди Мадрид суди. Судда агар УЕФА бу қарорга риоя қилмаса, унга нисбатан тергов иши қўзғатилиши айтилди. Шунингдек, суд УЕФАдан «Реал», «Ювентус» ва «Барселона» клубларига нисбатан қўлланилган санкцияларни бекор қилишни сўради. Аввалроқ ташкилот клубларга жазо сифатида Еврокубокдаги даромадининг 5 фоизидан воз кечишни ва 15 миллион евро миқдорида хайрия қилишни белгилаб қўйганди.

Апрель ойида Европанинг 12 клуби янги мусобақага асос солинганини эълон қилганди. Бироқ бу лойиҳа икки кун яшади. Аввалига АПЛ грандлари, кейин эса бошқа клублар лойиҳани тарк этишини эълон қилди. Ҳозирда фақат юқоридаги уч клуб Суперлига аъзолигидан чиқмаган.

Энг бой MMA вакиллари рейтинги тузилди. South China Morning Post нашри MMA тарихидаги энг бой шахслар рўйхатини тузди. Унга кўра, биринчи ўринда Конор Макгрегор қайд этилган. Ирландиялик спортчининг бойлиги 400 миллион долларга баҳоланган. UFC енгил вазн тоифасининг собиқ чемпиони Ҳабиб Нурмагомедов эса (40 млн доллар) иккинчи ўринда қайд этилган. Кучли бешликдан Жорж Сен-Пьер (30 млн доллар), Брок Леснар (25 млн доллар) ва Би Жей Пенн (22 млн доллар) жой олган.

Криштиану Роналдунинг Instagram саҳифасидаги битта реклама нархи 1,6 миллион долларга тенг, дея хабар қилмоқда BBC. Бу Instagram’даги шахслар ичида энг юқори кўрсаткич ҳисобланади. Роналду биринчи марта бу борада етакчига айланди. Ундан кейинги ўринларда актёр Дуэйн Жонсон (1,52 млн доллар) ва қўшиқчи Арина Гранде (1,51 млн доллар) бормоқда. Месси (1,1 млн доллар) бу борада еттинчи ўринда бўлса, Неймар (824 минг доллар) 16-поғонадан жой олган. Аввалроқ Роналду Instagram’да 300 миллион обуначига эга илк шахсга айланганди.

Трансфер янгиликлари

Серхио Рамос «ПСЖ» билан 2023 йилнинг ёзига қадар мўлжалланган шартнома имзолайди. Яқин орада испаниялик футболчи тиббий кўрикдан ўтади, дея хабар қилмоқда Фабрицио Романо. Хабарларга кўра, Рамос «ПСЖ»га ўтиш учун АПЛ клубларидан тушган фойдалироқ таклифларни рад этган. Футболчи 2020/21-мавсум якунида «Реал»ни эркин агент сифатида тарк этганди.

Килиан Мбаппе Евро—2020 дан кейин таътилга йўл олди. Гап шундаки, «ПСЖ» футболчига катта маошга эга шартнома таклиф қилган ва бу масалани муҳокама қилиш учун футболчини музокараларга чақирган. Бироқ Килиан 2022 йил ёзида тугайдиган келишувни узайтирмаслигини Париж клуби раҳбарларига маълум қилган. Қайд этилишича, «ПСЖ»нинг таклиф қилган янги шартномаси нафақат, Килиан учун, балки унинг оила аъзолари учун ҳам молиявий томондан фойдали. Аввалроқ «ПСЖ» Килианнинг 15 ёшли укаси Итан Мбаппе билан шартнома имзолаганди.

Жейдон Санчонинг «Манчестер Юнайтед»га ўтиши расман тасдиқланди. «Боруссия Д» футболчи 85 миллион евро эвазига инглиз клуби сафига ўтаётганини маълум қилди. Эслатиб ўтамиз, дортмундликлар ўтган ёзда «Манчестер Юнайтед»нинг Санчо борасида 100 миллион евролик таклифига рад жавобини берганди.