АҚШ бош прокурори Меррик Гарланд ўлим жазосига вақтинчалик мораторий жорий этиш (тақиқлаш) тўғрисида меморандум чиқарди. Бу ҳақда Адлия вазирлиги матбуот хизматига таяниб, «РБК» хабар берди.
«Биз нафақат АҚШ Конституцияси ва қонунлари билан кафолатланган ҳуқуқлар жиноий суд иштирокчиларининг барчаси томонидан ҳурмат қилинишини, балки адолатли ва инсонпарвар муносабатни таъминлашимиз керак. Ушбу мажбурият, айниқса, ўлим жазоси тайинланган жиноятлар учун амал қилади», — деди Гарланд.
Адлия вазирлигининг таъкидлашича, сўнгги икки йил ичида процедурага баъзи ўзгаришлар киритилди ва 17 йил ичида федерал даражадаги биринчи қатллар ўлимга олиб келувчи инъекция шаклида амалга оширилди. Бироқ энди ушбу усулнинг инсонпарварлик даражасини баҳолаш, шунингдек, федерал жиноятчиларни қатл қилишга имкон берадиган тузатишларни батафсил кўриб чиқиш талаб этилади.
Бунинг учун вазирлик федерал идоралар, давлат ҳокимияти органлари ва тиббиёт мутахассислари билан бир қатор консультациялар ўтказмоқчи. Текширувлар ва маслаҳатлашувлар қанча давом этиши ва ўлим жазосига мораторий қачонгача амал қилиши ҳақида хабар берилмаган.
2003 йилдан 2020 йилгача АҚШда федерал даражадаги ўлим жазоси амалга оширилмаган. Шу билан бирга, штатлар ҳукуматлари, уни мустақил равишда тайинлаши ва ўтказиши мумкин бўлган. Американинг 23 штатида ўлим жазоси тақиқланган.
2019 йилда Адлия вазирлиги федерал қамоқхоналарда ўлим жазосини ижро этишга рухсат берди. Ўша пайтдаги бош прокурор Уильям Барр АҚШ Жазони ижро этиш федерал бошқармаси бошлиғи Хью Гурвитсга болалар ва қарияларни ўлдиришда айбдор деб топилган беш нафар энг шафқатсиз жиноятчини қатл этишни буюрди.
Мораторий бекор қилинганидан бери биринчи федерал даражадаги қатл 2020 йил сентябрь ойида Indiaна штатида амалга оширилди: ўшанда жиноятчи Кристофер Валвага ўлимга олиб келувчи инъекция қилинди, у 1999 йилда 19 ёш пайти насронийлик фаоллари бўлган жуфтликни ўлдиргани учун жазоланди.
2020 йилнинг ноябрида Европа Иттифоқи АҚШда ўлим жазоси қўлланилишидан хавотир билдирган эди. «Европа Иттифоқи ҳар қандай вақтда ва ҳар қандай ҳолатда ҳам ўлим жазосига қатъий қарши эканини эслатиб ўтади ва АҚШ маъмуриятини ушбу қарорни қайта кўриб чиқишга ва уни федерал даражада тўхтатишга чақиради», — дейилганди Брюссель баёнотида.
Бироқ шундан кейин Адлия вазирлиги жиноятчиларни ўлдириш усуллари рўйхатини кенгайтириб, уларга отиб ўлдириш, газли камера ва электр стулни қўшди. Вашингтонда фармацевтика компаниялари қамоқхоналарга ўлимга олиб келувчи инъекция учун зарур бўлган дори-дармонларни етказиб бермайди, шунинг учун ҳукумат муқобил усулларни тақдим этишга қарор қилган.
Изоҳ (0)