Qozog‘istonda bir qator tashkilotlar xodimlari uchun majburiy vaksinatsiya joriy qilindi. Bu haqda respublikaning bosh sanitariya shifokori farmoniga asoslanib, Tengrinews xabar berdi.
Xabarga ko‘ra, emlanmaganlar masofadan ishlashga o‘tkaziladi. Agar xodim ofisda ishlashni xohlasa, u haftada bir marta PZR-testidan o‘tishi shart.
Do‘konlar, kafelar va restoranlar, go‘zallik salonlari, fitness klublari, muzeylar, teatrlar, mehmonxonalar, transport, sog‘liqni saqlash va uy-joy kommunal xo‘jaligi xodimlari ham majburiy vaksinatsiyadan o‘tkaziladi.
Ular vaksinaning birinchi komponentini 15-iyulgacha, ikkinchisini 15-avgustgacha olishi lozim. Tibbiy jihatdan emlanish tavsiya etilmaganlarga, shuningdek, so‘nggi uch oy ichida COVID-19 dan tuzalganlarga vaksinatsiya majburiy emas.
Aprel oyida Qozog‘istonda vazirliklarda ishlovchi mansabdor shaxslari uchun koronavirusga qarshi majburiy vaksinatsiya joriy qilingandi: prezident ma’muriyatining bosh shifokori markaziy davlat apparati xodimlarini “100 foiz emlash to‘g‘risida” qaror qabul qilgan. Emlanish tavsiya etilmaganlar hamda emlanmaganlar masofadan ishlashga ko‘chirilgan. Ishxonaga kelish uchun esa ular o‘z hisobidan PZR-testidan o‘tishi kerak bo‘lgan.
Qozog‘istonda koronavirusga qarshi emlash “Sputnik V” (Rossiya), mahalliy ishlab chiqarilgan QazVac, shuningdek, Xitoyning Hayat-Vax (BAAdagi Sinopharm kompaniyasida ishlab chiqariladi) va CoronaVac (Sinovac) vaksinalari yordamida amalga oshirilmoqda.
Avvalroq Qozog‘istonda koronavirusga qarshi majburiy emlanishdan bosh tortganlarga jarima solinishi haqida xabar berilgandi.
Izoh (0)