Amazon asoschisi va sayyoraning eng boy kishisi Jeff Bezos 82 yoshli amerikalik uchuvchi ayol Uolli Fankni o‘zi bilan birga koinotga uchishga taklif qildi. Bu haqda milliarder o‘zining Instagram sahifasida ma’lum qilgan, deb yozadi “RBK”.
Bezosning xabarida aytilishicha, Fank “Merkuriy-13” guruhidagi eng yaxshi uchuvchilardan biri bo‘lgan. (1960-yillarda ayol kosmonavtlarni AQShning birinchi uchuvchili kosmik dasturi bo‘yicha parvozlarga tayyorlash dasturi).
“Hech kim u kabi uzoq kutmagan. Trening tugaganiga qaramay, dastur bekor qilingan va 13 ayoldan hech biri koinotga uchmagan. Vaqt bo‘ldi. Uolli, jamoaga xush kelibsiz. 20-iyul kuni biz bilan faxriy mehmon sifatida parvoz qilishingizdan mamnun bo‘lamiz”, — deb yozgan milliarder.
Bezosning postiga ilova qilingan videoda tadbirkor Fankka yaqinlashib kelayotgan parvozni tasvirlab beradi va bunga ayol nima deyishini so‘raydi. Uchuvchi ayol unga shunday javob beradi: “Nima deyishim mumkin. Bu mening hayotimda yuz bergan eng yaxshi hodisa!”.
NASA dasturi bekor qilingandan so‘ng Fank parvoz bo‘yicha instruktor bo‘lib ishlagan, so‘ngra Federal aviatsiya boshqarmasining aviahalokatlar bo‘yicha tekshiruv o‘tkazadigan birinchi ayol tergovchisi bo‘lgan.
Jeff Bezos koinotga 20-iyul kuni parvoz qiladi.
Britaniyalik milliarder Richard Brenson kosmosga shu yilning 11-iyulida — Bezosdan to‘qqiz kun oldin uchadi. Bu haqda Virgin Galactic kompaniyasining Twitter’ida e’lon qilindi.
“11-iyul kuni birinchi uchuvchili parvozimizni va yangi koinot asrining boshlanishini tomosha qilish uchun bizga qo‘shiling. Parvoz kunini hisoblash uchun vaqt ketdi”, — deyilgan xabarda.
E’longa ilova qilingan qisqa videoda Unity suborbital kosmik kemaning olti ekipaj a’zosini ko‘rish mumkin. Ular orasida uchuvchilar Deyv Makkay va Maykl Masuchchi, astronavtlar Sirisha Bandla, Kilin Bennet va Bette Mozes, shuningdek, kompaniya rahbari Richard Brenson bor.
Virgin Galactic — dunyo miqyosida kosmik turizm sohasidagi birinchi ommaviy kompaniya. 2020-yil noyabr oyida kompaniya 2021-yilning birinchi choragi oxirida Virgin Group asoschisi Richard Branson kosmosga uchishini, shundan so‘ng parvozlar uchun chiptalarni sotish boshlanishini e’lon qildi.
Izoh (0)