O‘zbekistonda anomal issiq havo tufayli poyezdlar harakat jadvalida o‘zgarishlar bo‘lishi mumkin, deb yozmoqda “O‘zbekiston temiryo‘llari” AJ matbuot xizmati.
Mamlakatga 28-iyundan boshlab Volga bo‘yi hududlaridan issiq va quruq havo kirib kelgandi. Hafta davomida O‘zbekiston bo‘yicha havo harorati kechalari 22—25 daraja, kunduz kunlari 38—41 daraja, shimolda, janubda va cho‘l hududlarining ba’zi joylarida 43 daraja issiq atrofida bo‘ladi.
“Albatta, bunday issiq havo paytida po‘lat izlardagi harorat yanada yuqori bo‘ladi. Shu bois, harakat xavfsizligini ta’minlash maqsadida 2021-yil 7-iyul sanasiga qadar cho‘l hududlarida poyezdlar harakat jadvalida o‘zgarishlar kuzatilishi mumkin”, — deyiladi xabarda.
Eslatib o‘tamiz, “O‘zgidromet” yuqoridagi ob-havo sharoiti iyun oyi oxiri, iyul oyi boshidagi o‘rtacha ko‘p yillik qiymatlardan 2—4 darajaga yuqori bo‘lishiga qaramasdan, O‘rta Osiyo iqlimi uchun, ayniqsa, so‘nggi yillarda bu anomal hodisa emasligini qayd etgandi.
Izoh (0)