Toshkent viloyatining qator tumanlarida fuqarolarning tabiatga nisbatan bee’tibor munosabatlari oqibatida 129 gektar yer maydoni yonib ketdi. Bu haqda viloyat Ekologiya va atrof-muhitni muhofaza qilish boshqarmasi matbuot xizmati xabar berdi.
Ma’lum qilinishicha, Toshkent viloyati Ekologiya va atrof-muhitni muhofaza qilish boshqarmasi hamda hududiy inspeksiyalari tomonidan 28—29-iyun kunlari ekologik nazorat tadbirlari olib borilgan. Tadbirlar davomida viloyatning qator tumanlarida boshoqli don ekinlaridan bo‘shagan maydonlarida somon yoqilishi natijasida jami 40 ta qonun buzilish holati aniqlangan.
Ayrim tadbirkorlar hamda fuqarolarning tabiatga nisbatan e’tiborsizligi natijasida 129 gektar yer maydoni yonib ketgan. Oqibatda atrof-muhitga 113 178 492 so‘m miqdorida zarar yetkazilgan.
Barcha qonun buzilish holatlari yuzasidan Ma’muriy javobgarlik to‘g‘risidagi kodeksning 88-moddasiga (atmosfera havosini muhofaza qilish talablariga rioya qilmaslik) asosan ma’muriy bayonnomalar rasmiylashtirilib, jarima hamda atrof-muhitga yetkazilgan zararni undirish bo‘yicha tayyorlangan materiallar sud organlariga qonuniy qaror chiqarish uchun yo‘naltirilgan.
Avvalroq Samarqandda g‘allasi o‘rib olingan 3 gektar yer yonib ketgani, Sirdaryodagi o‘rmon xo‘jaligining salkam 150 gektar maydoni yonib ketgani haqida xabar berilgan edi.