Toshkent shahrida YHXB inspektorlari tomonidan ta’qib qilingan voyaga yetmagan bola boshqaruvidagi Matiz Cobalt bilan to‘qnashdi (video)

Internet tarmog‘ida Toshkent shahar IIBB xizmat avtomobili huquqbuzarni ta’qib qilayotgani aks etgan video tarqaldi. Toshkent shahar IIBB video bo‘yicha izoh berdi.

Qayd etilishicha, 2021-yil 29-iyun kuni, taxminan, soat 02:30 da Olmazor tumanidagi Kichik halqa avtomobil yo‘lida Toshkent shahar IIBB YHXB YPX inspektori kichik serjant E.Rasulov xizmat olib borishi davomida Matiz rusumli avtomobilning (davlat raqami 90 N 480 FA) harakatlari uning e’tiborini tortgan.

Inspektor jezl va hushtak orqali haydovchiga to‘xtash ishorasini ko‘rsatgan. Ammo haydovchi inspektorning qonuniy talabiga bo‘ysunmasdan, harakatni davom ettirgan va bu bilan Ma’muriy javobgarlik to‘g‘risidagi kodeksning 194-moddasida (ichki ishlar organlari xodimining qonuniy talablarini bajarmaslik) qayd etilgan huquqbuzarlikni sodir etdi.

Shu sababli Vazirlar Mahkamasining 2018-yil 1-dekabrdagi 975-sonli qarorining 3-bobi 12-bandi asosida “transport vositasini ta’qib qilish yoki kuzatish” hamda “jinoyat sodir etganlikda gumon qilinayotgan shaxslarni, transport vositasida huquqbuzarlik sodir etib, hodisa joyidan yashiringan, YPX xodimining qonuniy talabiga bo‘ysunmagan transport vositalarini ushlab turish” huquqi berilgani bois Toshkent shahar IIBB xodimi o‘ziga biriktirilgan xizmat avtomobilida yuqoridagi avtomobilni ta’qib qila boshlagan.

Harakatlanish davomida Matiz avtomobili boshqaruvni yo‘qotib, Cobalt avtomobiliga (davlat raqami 01 E 455 LB) to‘qnashgan va qonun talablarini buzgan holda voqea joyini tark etgan. Bu bilan u Ma’muriy javobgarlik to‘g‘risidagi kodeksning 137-moddasida (yo‘l-transport hodisasi yuz bergan joydan ketib qolish) nazarda tutilgan huquqbuzarlikni sodir etgan.

Mazkur YTHda hech kim jabrlanmagan.

Biroq shundan keyin ham Matiz haydovchisi javobgarlikdan qochish maqsadida qarama-qarshi harakat yo‘liga chiqib, atrofdagi transport vositalari uchun xavf tug‘dirgan va Ma’muriy javobgarlik to‘g‘risidagi kodeksning 128-5-moddasini (transport vositalari haydovchilarining xalaqit berishi yoki avariya holatini yuzaga keltirishi, yo‘lning qarama-qarshi harakatlanish uchun mo‘ljallangan tomoniga yoki bo‘lagiga chiqishi) buzgan.

Ko‘rilgan choralar natijasida Matiz avtomobili to‘xtatilgan. Uni boshqargan 2004-yilda tug‘ilgan Z.A.ning haydovchilik guvohnomasi va boshqa hujjatlari yo‘q ekani aniqlangan.

Hozirgi vaqtda mazkur holat bo‘yicha surishtiruv ishlari olib borilmoqda. Avtomobil Ma’muriy javobgarlik to‘g‘risidagi kodeksning 291-moddasi 1-qismi “a” bandiga muvofiq jarima maydonchasiga joylashtirildi.

Shuningdek, Toshkent shahar IIBB xodimlari video muallifining xatti-harakatlariga huquqiy baho berilishi hamda tekshiruv yakuni bo‘yicha unga nisbatan qonuniy choralar ko‘rilishi qayd etilgan.