Navoiy viloyati Xatirchi tumanida bir guruh shaxslar ularning qoidabuzarligini suratga olishda gumon qilingan fuqarolarni do‘pposlab, mashinasiga zarar yetkazdi. Bu haqda Navoiy viloyati IIB xabar qildi.
Qayd etilishicha, 2021-yilning 29-iyun kuni Xatirchi tumani “Ko‘ksaroy” mahallasida yashovchi Sh.A. hamda ushbu mahallada yashovchi S.O. tuman markazida taksichilik bilan shug‘ullanuvchi shaxslarning avtomashinalarining davlat raqamlarini suratga olgan.
Shu vaqtda tuman markazida taksichilik bilan shug‘ullanuvchi bir necha shaxslar ularni ko‘rib, ulardan nima sababdan suratga tushirib yurganini, buning uchun ularga jarima belgilanayotganini ma’lum qilgan.
Shunda Sh.A. va S.O. mashinalarning davlat raqamlarini suratga tushirmaganini aytgandan so‘ng ushbu shaxslarni tuman markazida taksichilik bilan shug‘ullanib yurgan shaxslar urib-do‘pposlab, suratga olgan telefon apparatlarini tortib olib, boshqarib yurgan 85 Q 127 GA davlat raqamli Spark avtomashinasining bamper, oyna va kuzov qismlariga moddiy zarar yetkazgan.
Olib borilgan tezkor tadbir davomida ushbu shaxslarning barchasi tuman IIB binosiga olib kelinib, shaxsiga aniqlik kiritilib, barmoq izlari olinib, holat yuzasidan batafsil tushuntirish xatlari olingan.
Mazkur holat yuzasidan Xatirchi tuman IIB tomonidan surishtiruv ishlari davom ettirilmoqda.
Eslatib o‘tamiz, O‘zbekistonda 2021-yil 1-yanvardan boshlab videoregistratorlar bilan birga, videokuzatuv va tasvirga olish texnika vositalari hamda mobil qurilmalar orqali qayd etilgan huquqbuzarlik holatlari aks etgan videoyozuvlar maxsus avtomatlashtirilgan texnika vositalari orqali qayd etilgan videoyozuvlarga tenglashtirilgan hamda Ma’muriy javobgarlik to‘g‘risidagi kodeksda belgilangan tartibda ko‘rib chiqilishi belgilangan.
Izoh (0)