Ўзбекистонда аномал иссиқ ҳаво туфайли поездлар ҳаракат жадвалида ўзгаришлар бўлиши мумкин, деб ёзмоқда «Ўзбекистон темир йўллари» АЖ матбуот хизмати.
Мамлакатга 28 июндан бошлаб Волга бўйи ҳудудларидан иссиқ ва қуруқ ҳаво кириб келганди. Ҳафта давомида Ўзбекистон бўйича ҳаво ҳарорати кечалари 22—25 даража, кундуз кунлари 38—41 даража, шимолда, жанубда ва чўл ҳудудларининг баъзи жойларида 43 даража иссиқ атрофида бўлади.
«Албатта, бундай иссиқ ҳаво пайтида пўлат излардаги ҳарорат янада юқори бўлади. Шу боис, ҳаракат хавфсизлигини таъминлаш мақсадида 2021 йил 7 июль санасига қадар чўл ҳудудларида поездлар ҳаракат жадвалида ўзгаришлар кузатилиши мумкин», — дейилади хабарда.
Эслатиб ўтамиз, «Ўзгидромет» юқоридаги об-ҳаво шароити июнь ойи охири, июль ойи бошидаги ўртача кўп йиллик қийматлардан 2—4 даражага юқори бўлишига қарамасдан, Ўрта Осиё иқлими учун, айниқса, сўнгги йилларда бу аномал ҳодиса эмаслигини қайд этганди.
Изоҳ (0)