Toshkentda 29—30-iyun kunlari “Uchinchi Renessans bunyodkorligi” shiori ostida O‘zbekiston yoshlari va talabalari forumi bo‘lib o‘tadi. Botanika bog‘ida barcha sanitariya talablariga rioya etilgan holda o‘tkazilishi kutilayotgan tadbir Yoshlar kuni va 2021-yil Yoshlarni qo‘llab-quvvatlash va aholi salomatligini mustahkamlash yili deb e’lon qilingani munosabati bilan poytaxt hokimligi, Yoshlar ishlari agentligi va boshqa idora-tashkilotlar tomonidan o‘tkazilmoqda.
Forumni o‘tkazishdan ko‘zlangan asosiy maqsad — tashabbuskor va iste’dodli yoshlarni aniqlash, ularga o‘z ko‘nikma va qobiliyatlarini namoyon etish, yosh avlodning ilm-fan, san’at, madaniyat va sportga bo‘lgan qiziqishini oshirish, talabalar va bitiruvchilarga jamiyatda munosib o‘rinlarini topishga yordam berishdir.
Tadbirga butun O‘zbekistondan 16 yoshdan 30 yoshgacha bo‘lgan 7 mingga yaqin yoshlarni jalb etish rejalashtirilgan. Tashkilotchilarning ma’lum qilishicha, forumning 29-iyundagi tadbirlarida qatnashish uchun ro‘yxatdan o‘tish @Yoshlar_forumi_bot Telegram-boti orqali amalga oshiriladi.
Forum doirasida maxsus pavilyonlarda yoshlarning mazmunli hordiq chiqarishini tashkil etish, ularning iqtidori va qobiliyatlarini yuzaga chiqarishga yo‘naltirilgan “Tafakkur sinovlari” intellektual tadbir va tanlovlari (“Chto? Gde? Kogda?”, “Mnemonika”, “Mental arifmetika”, “Shaxmat”, “Kubik-Rubik”) o‘tkaziladi.
Aniq fanlarni chuqur biladigan, xotirasi kuchli yoshlar o‘rtasida sun’iy intellekt sohasidagi musobaqalar, yosh olimlar, marketologlar bilan uchrashuvlar, “Marketing.uz”, “Design Club Uzbekistan”, “Modul 5”, “Biznesga qadam” va shu kabi istiqbolli loyihalar taqdimotlari o‘tkaziladi.
Maxsus maydonlarda mahorat darslari, ilm-fan, sport va tadbirkorlik sohasida yuqori natijalarga erishgan, yosh avlodga o‘rnak bo‘lib kelayotgan insonlar bilan uchrashuvlar tashkil qilinadi.
“Yashil tashabbus” kampaniyasida yoshlar atrof-muhitni muhofaza qilishga qaratilgan tadbirlarda qatnashadi va aksiyani butun respublika bo‘ylab targ‘ib qilishga harakat qiladi. Forum doirasida Yoshlar simfonik orkestrining konserti ham tashkil etilishi ko‘zda tutilgan.
Yoshlar va talabalar forumining yakunida taniqli estrada xonandalari, DJ’lar va shou-biznes vakillari ishtirokida katta gala-konsert bo‘lib o‘tadi. Tashkilotchilarning alohida qayd etishicha, forum doirasidagi barcha tadbirlar ochiq havoda, karantin me’yorlariga rioya qilgan holda o‘tkaziladi.
Ma’lumot uchun, forumning 29-iyundagi tadbirlariga Telegram’dagi @Yoshlar_forumi_bot orqali ro‘yxatdan o‘tganlar kiritiladi, 30-iyundagi tadbirlarga kirish esa faqat taklifnomalar orqali amalga oshiriladi.
Izoh (0)