Zangiota tumanidagi 2016 ta o‘ringa ega bo‘lgan 1-son yuqumli kasalliklar shifoxonasida 1400 nafardan ortiq bemor davolanayotgani haqida xabar berilgan edi. Ushbu shifoxona direktori Anvar Husanov bemorlarning qanchasi homilador ayollar va chaqaloqlar ekanini SSV matbuot xizmatiga ma’lum qildi.
Uning so‘zlariga ko‘ra, muassasada homilador ayollar uchun 158 o‘rinli tug‘ruq kompleksi bo‘lib, shundan homiladorlar patologiyasi bo‘limi 146 ta, reanimatsiya bo‘limi 12 ta o‘ringa mo‘ljallangan. Shu bilan birga, 30 o‘rin chaqaloqlar va 6 o‘rin reanimatsiya bo‘limiga ajratilgan. Hozirgi kunda markazda 138 nafar homilador ayol va 15 nafar chaqaloq davolanmoqda.
Shuningdek, markazda davolanayotganlar orasida 162 nafar 18 yoshgacha bo‘lgan bolalar borligini qayd etgan.
“Bugungi kunda koronavirus infeksiyasining mutatsiyalarga uchrashi va uning ko‘plab shtammlari aniqlanayotgani pandemik vaziyatni yanada chigallashtirmoqda. Xususan, kasallikning ‘britancha’ shtammi bolalarda ham ko‘p kuzatilib, ayrimlarda esa kasallik og‘ir o‘tmoqda”, — degan Anvar Husanov.
Sog‘liqni saqlash vazirligi ma’lumotlariga ko‘ra, 26-iyun kuni 493 kishida koronavirus aniqlanib, mamlakatda COVID-19 rasman qayd etilganlar soni 109 223 nafarga yetdi. Tibbiyot muassasalarida 3488 nafar bemor davolanmoqda.
Izoh (0)