Zangiotadagi 1-son yuqumli kasalliklar shifoxonasida qancha bemor davolanayotgani ma’lum qilindi

O‘zbekistonda koronavirus bilan kasallanish holati ortayotganligi sababli oxirgi 10-15 kun ichida Zangiota tumanidagi yuqumli kasalliklar shifoxonasiga bemorlar murojaatlari nisbatan ko‘paydi. Bu haqda Zangiota 1-son yuqumli kasalliklar shifoxonasi direktori Anvar Husanov SSV matbuot xizmatiga ma’lum qildi.

“Afsuski, so‘nggi kunlarda mamlakatimiz, xususan, poytaxtimizdagi epidemiologik vaziyatning biroz murakkablashishi Zangiota tumanidagi 1-son yuqumli kasalliklar shifoxonasi faoliyatiga ham ta’sir etmay qolmadi. Ayniqsa, oxirgi ikki hafta davomida tibbiyot muassasamizga murojaat qiluvchi bemorlar soni keskin ortgani, biz shifokorlarni jiddiy tashvishga solmoqda. Xususan, ayni paytda 2016 ta o‘ringa ega bo‘lgan shifoxonada 1400 nafardan ortiq bemor belgilangan standartlar bo‘yicha davolanmoqda”, — degan Anvar Husanov.

Uning aytishicha, shifoxonada 6 ta reanimatsiya bo‘limi bor va ularda 232 ta o‘rin tashkil qilingan. Hozirgi kunda ushbu reanimatsiya bo‘limlarida 203 nafar bemor belgilangan standartlar bo‘yicha davolanmoqda. Bo‘sh o‘rinlar soni esa 29 tani tashkil etmoqda.

Reanimatsiya bo‘limidagi har bir koyka sun’iy o‘pka ventilyatsiyasi va zamonaviy davolash apparatlari bilan jihozlangan. Shu bilan birga, har bir bo‘limda sanitar o‘tkazgich tashkil qilingan.

Eslatib o‘tamiz, 21-iyun kuni “O‘zbekiston 24” telekanali tomonidan tayyorlangan lavhada Zangiotadagi 1 va 2-yuqumli kasalliklar shifoxonasiga bo‘layotgan murojaatlar so‘nggi kunlarda ikki barobarga oshgani ma’lum qilingandi.

Sog‘liqni saqlash vazirligi ma’lumotlariga ko‘ra, 26-iyun kuni 493 kishida koronavirus aniqlanib, mamlakatda COVID-19 rasman qayd etilganlar soni 109 223 nafarga yetdi. 25-iyun kuni koronavirus infeksiyasini yuqtirib olish bilan bog‘liq 546 ta yangi holat ro‘yxatga olinib, kunlik kasallanish bo‘yicha 2021-yilning eng yuqori ko‘rsatkichi bo‘lgandi.

Mamlakatda kunlik kasallanish holatlari soni yana ortayotganligi sababli Respublika bo‘ylab 28-iyundan karantin cheklovlari kuchaytiriladi. Toshkent shahriga 28-iyundan transport vositalari kirishiga hamda ko‘ngilochar va ovqatlanish obyektlari faoliyatiga cheklovlar o‘rnatiladi. Bundan tashqari, Toshkentda 18 yoshdan oshganlar 28-iyundan koronavirusga qarshi ommaviy emlanadi.