Тошкентда 29—30 июнь кунлари «Учинчи Ренессанс бунёдкорлиги» шиори остида Ўзбекистон ёшлари ва талабалари форуми бўлиб ўтади. Ботаника боғида барча санитария талабларига риоя этилган ҳолда ўтказилиши кутилаётган тадбир Ёшлар куни ва 2021 йил Ёшларни қўллаб-қувватлаш ва аҳоли саломатлигини мустаҳкамлаш йили деб эълон қилингани муносабати билан пойтахт ҳокимлиги, Ёшлар ишлари агентлиги ва бошқа идора-ташкилотлар томонидан ўтказилмоқда.
Форумни ўтказишдан кўзланган асосий мақсад — ташаббускор ва истеъдодли ёшларни аниқлаш, уларга ўз кўникма ва қобилиятларини намоён этиш, ёш авлоднинг илм-фан, санъат, маданият ва спортга бўлган қизиқишини ошириш, талабалар ва битирувчиларга жамиятда муносиб ўринларини топишга ёрдам беришдир.
Тадбирга бутун Ўзбекистондан 16 ёшдан 30 ёшгача бўлган 7 мингга яқин ёшларни жалб этиш режалаштирилган. Ташкилотчиларнинг маълум қилишича, форумнинг 29 июндаги тадбирларида қатнашиш учун рўйхатдан ўтиш @Yoshlar_forumi_bot Telegram-боти орқали амалга оширилади.
Форум доирасида махсус павильонларда ёшларнинг мазмунли ҳордиқ чиқаришини ташкил этиш, уларнинг иқтидори ва қобилиятларини юзага чиқаришга йўналтирилган «Тафаккур синовлари» интеллектуал тадбир ва танловлари («Что? Где? Когда?», «Мнемоника», «Ментал арифметика», «Шахмат», «Кубик-Рубик») ўтказилади.
Аниқ фанларни чуқур биладиган, хотираси кучли ёшлар ўртасида сунъий интеллект соҳасидаги мусобақалар, ёш олимлар, маркетологлар билан учрашувлар, «Marketing.uz», «Design Club Uzbekistan», «Modul 5», «Бизнесга қадам» ва шу каби истиқболли лойиҳалар тақдимотлари ўтказилади.
Махсус майдонларда маҳорат дарслари, илм-фан, спорт ва тадбиркорлик соҳасида юқори натижаларга эришган, ёш авлодга ўрнак бўлиб келаётган инсонлар билан учрашувлар ташкил қилинади.
«Яшил ташаббус» кампаниясида ёшлар атроф-муҳитни муҳофаза қилишга қаратилган тадбирларда қатнашади ва акцияни бутун республика бўйлаб тарғиб қилишга ҳаракат қилади. Форум доирасида Ёшлар симфоник оркестрининг концерти ҳам ташкил этилиши кўзда тутилган.
Ёшлар ва талабалар форумининг якунида таниқли эстрада хонандалари, DJ’лар ва шоу-бизнес вакиллари иштирокида катта гала-концерт бўлиб ўтади. Ташкилотчиларнинг алоҳида қайд этишича, форум доирасидаги барча тадбирлар очиқ ҳавода, карантин меъёрларига риоя қилган ҳолда ўтказилади.
Маълумот учун, форумнинг 29 июндаги тадбирларига Telegram’даги @Yoshlar_forumi_bot орқали рўйхатдан ўтганлар киритилади, 30 июндаги тадбирларга кириш эса фақат таклифномалар орқали амалга оширилади.
Изоҳ (0)