Ko‘cha san’ati namunasini Inkuzart taxallusi bilan ijod qilayotgan ko‘cha rassomi Abdurahmon Umarov yozuvchi, shoir, jurnalist, siyosiy arbob va Turkiston jadidchiligining g‘oyaviy yetakchilaridan biri bo‘lgan Abdurauf Fitrat xotirasiga bag‘ishlangan strit-art chizdi.
Toshkentning Chilonzor tumanidagi Muqimiy—Chilonzor ko‘chalari chorrahasida joylashgan ko‘p qavatli uy devorida aks ettirilgan ushbu ijod namunasi Abdulla Qodiriy va Cho‘lpon xotirasiga bag‘ishlangan strit-artning yoniga chizilgan.
Ko‘cha rassomi Abdulla Qodiriy xotirasi uchun strit-artni 19-aprelda chizib, yoniga “Ahvolimiz” nomli g‘azalini ham tushirgandi. Cho‘lpon xotirasiga bag‘ishlangan strit-artni esa 19-iyun kuni chizgandi va yoniga To be continued..., ya’ni “Davomi bor...” yozuvli tablichka ham ilib ketgandi.
2020-yilning yozida Abdurahmon Umarov Chilonzor tumanidagi dahalarni turli tasvirlar bilan “boyitish” niyatida ekanini ma’lum qilgandi. “Chilonzorni galerеyaga aylantirmoqchiman. Keyin esa boshqa tumanlar, shaharlar, mamlakatlar va qit’alarga o‘taman” — degan edi o‘shanda.
Uning so‘zlariga ko‘ra, Chilonzor ko‘chalarida san’atga joy topish qiyin. Qonunchilikka ko‘ra turar joy binolarining devorlariga chizishga ruxsat berilmagan.
Izoh (0)