O‘zbekiston va “Yandeks” Rossiyadagi taksi xizmatlarida ishlashda O‘zbekistonning haydovchilik guvohnomasidan foydalanishga ruxsat olishga erishishni rejalashtirmoqda. Bu haqda O‘zbekiston bandlik va mehnat munosabatlari vazirining o‘rinbosari Erkin Muhitdinov va “Yandeks” kompaniyasi vakillari o‘rtasida o‘tkazilgan uchrashuv yakunlarida ma’lum bo‘ldi, deb xabar beradi “Podrobno.uz”
Bugungi kunda Rossiyada faqat mamlakat va Qirg‘iziston yoki rus tili rasmiy til sifatida qabul qilingan mamlakatlarning haydovchilik guvohnomalari bilan taksi xizmatlarida faoliyat ko‘rsatish mumkin. Bundan tashqari, haydovchining ish staji 3 yildan kam bo‘lmasligi kerak.
Umuman olganda, Rossiya kompaniyasi “Yandeks” servislarida ishlovchi o‘zbek muhojirlarining moslashishi uchun qator kompleks choralari tayyorlamoqda.
Masalan, kompaniya “Yandeks. Taksi” agregatori va “Yandeks yetkazib berish” servisida ishlaydigan O‘zbekiston fuqarolariga rus tilini o‘rgatish darslarini taklif qilmoqda.
Bundan tashqari, kompaniya kuryer va haydovchi bo‘lib ishlovchi o‘zbekistonliklarni koronavirusga qarshi emlash masalasini ham hal etish niyatida. Emlangan fuqarolar ma’lum imtiyozlarga ega bo‘ladi, masalan, buyurtmalar reytingi yoki smena narxi ko‘tariladi.
Eslatib o‘tamiz, Rossiyada 2017-yil 1-iyundan taksi, avtobus, “marshrutka” va yuk mashinalari haydovchilarining xorijiy haydovchilik guvohnomalari bilan ishlashini taqiqlovchi qonun kuchga kirgan. Qonun 2013-yildayoq qabul qilingan, biroq uning kuchga kirishi muntazam kechiktirib kelinayotgan edi. Shunga qaramay, Rossiyada mehnat qilayotgan minglab haydovchilarga ushbu qonun ta’sir ko‘rsatgan va mamlakatning yirik shaharlarida vaqtinchalik taksi yetishmovchiligini yuzaga keltirgandi.
Izoh (0)