Buxoroda Oliy Majlis Senati, Vazirlar Mahkamasi, Iqtisodiy taraqqiyot va kambag‘allikni qisqartirish vazirligi hamda Birlashgan Millatlar Tashkiloti (BMT)ning mamlakatdagi tuzilmalari hamkorligida xalqaro forum bo‘lib o‘tdi. Bu haqda forumda ishtirok etgan “Daryo” muxbiri xabar berdi.
Buxoro shahridagi “Sahih Zarafshon” mehmonxonasida o‘tkazilgan forumda dunyoning 30 dan ortiq mamlakatlari parlamentlari a’zolari, jumladan, Yevroparlament, Kanada, Buyuk Britaniya, Germaniya, Fransiya, Italiya, Ispaniya, Latviya, Bolgariya, Koreya Respublikasi, Xitoy, Yaponiya, Indoneziya, Malayziya, Tailand, Turkiya, Eron, Ozarbayjon, Afg‘oniston, Qirg‘iziston va xalqaro tashkilotlardan 30 nafar spiker ham ishtirok etgan.
Ochilish marosimida forumning dunyo parlamentarizmi tarixida birinchi bor o‘tkazilayotgani haqida so‘z yuritilgan.
“2009-yilda 189 davlat hamkorligida o‘tkazilgan ming yillik rivojlanish maqsadlari forumi O‘zbekiston uchun ham 2015-yilga qadar sakkiz tamoyil asosida muhim rivojlanish bosqichini o‘tagan edi. Va mazkur forum ham O‘zbekistonda, ilk bor Buxoroyi sharifda o‘tkazilgandi. Oradan 12 yil o‘tib, mazkur loyiha — barqaror rivojlanish maqsadlarining ham ilk bor Buxoroda o‘tkazilayotgani sharif shaharning dunyo xalqlari ehtiromiga munosib ekanidan darak. Bu galgi xalqaro forum parlamentlarga mintaqaviy va global darajada barqaror rivojlanish maqsadlariga erishish yo‘lidagi taraqqiyotni rejalashtirish, budjetni ishlab chiqish va tasdiqlash, amalga oshirish va monitoring qilish bo‘yicha qarorlarni aniqlash uchun turli mamlakatlardan tajriba almashish imkoniyatini beradi”, — dedi Oliy Majlis Senati raisi Tanzila Norboyeva.
“Bu ishlarni amalga oshirish siyosiy istakka bog‘liq bo‘ladi. O‘zbekistonda ana shunday siyosiy xohish ustuvorligi menda havas uyg‘otdi. Taqdim qilgan rezolyutsiya muvaffaqiyatni ta’minlashiga ishonaman. O‘zbekistonni dunyoga aytib berish uchun havas qilgulik hikoyasi bor va bu forum mana shu hikoyani parlamentlar bilan baham ko‘rishi eng yaxshi imkoniyatdir”, — dedi xorijlik mehmon Martin Chungkong.
Ta’kidlanishicha, ikki kun davom etgan forumda barqaror rivojlanish maqsadlarini amalga oshirishda parlamentlararo global hamkorliknining yangi qirralari va imkoniyatlari yaratilishi ko‘zda tutilgan.
Izoh (0)