Бухорода Олий Мажлис Сенати, Вазирлар Маҳкамаси, Иқтисодий тараққиёт ва камбағалликни қисқартириш вазирлиги ҳамда Бирлашган Миллатлар Ташкилоти (БМТ)нинг мамлакатдаги тузилмалари ҳамкорлигида халқаро форум бўлиб ўтди. Бу ҳақда форумда иштирок этган «Дарё» мухбири хабар берди.
Бухоро шаҳридаги «Саҳиҳ Зарафшон» меҳмонхонасида ўтказилган форумда дунёнинг 30 дан ортиқ мамлакатлари парламентлари аъзолари, жумладан, Европарламент, Канада, Буюк Британия, Германия, Франция, Италия, Испания, Латвия, Болгария, Корея Республикаси, Хитой, Япония, Индонезия, Малайзия, Таиланд, Туркия, Эрон, Озарбайжон, Афғонистон, Қирғизистон ва халқаро ташкилотлардан 30 нафар спикер ҳам иштирок этган.
Очилиш маросимида форумнинг дунё парламентаризми тарихида биринчи бор ўтказилаётгани ҳақида сўз юритилган.
«2009 йилда 189 давлат ҳамкорлигида ўтказилган минг йиллик ривожланиш мақсадлари форуми Ўзбекистон учун ҳам 2015 йилга қадар саккиз тамойил асосида муҳим ривожланиш босқичини ўтаган эди. Ва мазкур форум ҳам Ўзбекистонда, илк бор Бухоройи шарифда ўтказилганди. Орадан 12 йил ўтиб, мазкур лойиҳа — барқарор ривожланиш мақсадларининг ҳам илк бор Бухорода ўтказилаётгани шариф шаҳарнинг дунё халқлари эҳтиромига муносиб эканидан дарак. Бу галги халқаро форум парламентларга минтақавий ва глобал даражада барқарор ривожланиш мақсадларига эришиш йўлидаги тараққиётни режалаштириш, бюджетни ишлаб чиқиш ва тасдиқлаш, амалга ошириш ва мониторинг қилиш бўйича қарорларни аниқлаш учун турли мамлакатлардан тажриба алмашиш имкониятини беради», — деди Олий Мажлис Сенати раиси Танзила Норбоева.
«Бу ишларни амалга ошириш сиёсий истакка боғлиқ бўлади. Ўзбекистонда ана шундай сиёсий хоҳиш устуворлиги менда ҳавас уйғотди. Тақдим қилган резолюция муваффақиятни таъминлашига ишонаман. Ўзбекистонни дунёга айтиб бериш учун ҳавас қилгулик ҳикояси бор ва бу форум мана шу ҳикояни парламентлар билан баҳам кўриши энг яхши имкониятдир», — деди хорижлик меҳмон Мартин Чунгконг.
Таъкидланишича, икки кун давом этган форумда барқарор ривожланиш мақсадларини амалга оширишда парламентлараро глобал ҳамкорликнининг янги қирралари ва имкониятлари яратилиши кўзда тутилган.
Изоҳ (0)